मुख्यमंत्री पत्रकार परिषदेला येण्यापूर्वीच सर्व तयारी झाली होती आणि मीडियाचे कॅमेरे सज्ज होते. माइकही सुरू करण्यात आले होते. पत्रकार परिषदेच्या ठिकाणी येण्यापूर्वी मुख्यमंत्री आणि उपमुख्यमंत्री आपसात बोलत होते. त्यावेळी एकनाथ शिंदे म्हणाले, आपण बोलून मोकळं व्हायचं आणि निघून जायचं. अजित पवारांनी त्यांना ‘एस’ म्हणत प्रतिसाद दिला. त्याचवेळी, माइक सुरू असल्याचं फडणवीसांच्या लक्षात आलं. त्यांनी खाली बसताना हळूच ही गोष्ट एकनाथ शिंदे यांच्या लक्षात आणून दिली. मात्र, त्यांनी चेहऱ्यावर कोणताही भाव न आणता पत्रकार परिषद सुरू केली. मात्र, त्यांचं वाक्य आणि एकूण दृश्ये कॅमेऱ्यात टिपली गेली आणि व्हायरल झाली. त्यामुळं राज्य सरकार मराठा आरक्षणाबाबत खरंच गंभीर आहे का, अशी चर्चा आता सुरू झाली आहे.
