गोडोलीतील धक्कादायक घटना; शिक्षक वडिलांना अटक, न्यायालयाकडून तीन दिवसांची पोलिस कोठडी
सातारा, प्रतिनिधी : घरातील किरकोळ वादाचे रूपांतर टोकाला जाऊन अल्पवयीन मुलीच्या मृत्यूपर्यंत पोहोचल्याची धक्कादायक घटना सातारा शहरातील गोडोली परिसरात घडली. या प्रकरणी शाहूपुरी पोलिसांनी मुलीचे वडील पुरुषोत्तम कदम यांना अटक केली असून, न्यायालयाने त्यांना तीन दिवसांची पोलिस कोठडी सुनावली आहे. या घटनेने परिसरात खळबळ उडाली आहे.
पोलिसांकडून मिळालेल्या प्राथमिक माहितीनुसार, घरामध्ये टीव्ही आणि मोबाईल बंद करण्यास सांगितल्यावर वडील आणि मुलीमध्ये वाद झाला. या वादातून घरातील वातावरण तणावपूर्ण झाले. याचदरम्यान मुलीकडून तिच्या लहान बहिणीलाही मारहाण झाल्याचे तिच्या आईने पोलिसांकडे दिलेल्या तक्रारीत नमूद केले आहे.
लहान मुलीला मारहाण झाल्यानंतर आई तिला घेऊन बेडरुममध्ये गेली आणि दरवाजा बंद केला. त्यामुळे त्यानंतर घरातील इतर भागात नेमके काय घडले, याची माहिती आईला मिळाली नसल्याचे तक्रारीत नमूद करण्यात आले आहे.
पहाटेच्या सुमारास आईला जाग आल्यानंतर तिला अल्पवयीन मुलगी निपचित अवस्थेत आढळून आली. मुलीला बॅटने मारहाण झाल्याने तिचा मृत्यू झाल्याचा आरोप आईने पोलिसांकडे दिलेल्या तक्रारीत केला आहे. घटनेची माहिती मिळताच शाहूपुरी पोलिसांनी तातडीने घटनास्थळी धाव घेतली आणि तपासाला सुरुवात केली.
या प्रकरणी पोलिसांनी खुनाचा गुन्हा दाखल करून मुलीचे वडील पुरुषोत्तम कदम यांना अटक केली. त्यांना न्यायालयात हजर करण्यात आले असता न्यायालयाने तीन दिवसांची पोलिस कोठडी सुनावली.
नेमके कारण काय? पोलिसांकडून तपास सुरू
दरम्यान, मुलीला मारहाण करण्यामागील नेमके कारण काय होते, मारहाण किती वेळ झाली, कोणत्या प्रकारच्या दुखापती झाल्या आणि तिचा मृत्यू नेमका कोणत्या कारणामुळे झाला, याचा तपास पोलिसांकडून करण्यात येत आहे.
घटनास्थळावरील परिस्थिती, उपलब्ध पुरावे तसेच संबंधित व्यक्तींचे जबाब यांची पोलिसांकडून पडताळणी केली जात आहे. शवविच्छेदन अहवाल आणि तपासातून मृत्यूचे नेमके कारण स्पष्ट होण्याची शक्यता आहे.
या प्रकरणाचा तपास शाहूपुरी पोलिसांकडून सुरू असून, उपअधीक्षक विपुल पाटील यांनी पत्रकार परिषदेत या घटनेच्या तपासाबाबत माहिती दिली. पोलिसांकडून विविध शक्यता तपासल्या जात असून, उपलब्ध पुराव्यांच्या आधारे पुढील कारवाई करण्यात येत आहे.
या घटनेमुळे गोडोली परिसरात हळहळ व्यक्त होत असून, एका कौटुंबिक वादाचा इतका गंभीर परिणाम कसा झाला, याबाबत परिसरात चर्चा सुरू आहे. पोलिस तपास पूर्ण झाल्यानंतर घटनेमागील संपूर्ण सत्य स्पष्ट होणार आहे.
