फलटण | प्रतिनिधी :- फलटण शहरातील नागरिकांसाठी अत्यंत महत्त्वाची आणि चिंताजनक बातमी समोर आली आहे. धरण क्षेत्रामध्ये अद्याप समाधानकारक पाऊस न झाल्यामुळे फलटण शहराला पाणीपुरवठा करणारा मुख्य स्त्रोत असलेला ‘निरा उजवा कालवा’ दिनांक १२ जून २०२६ पासून बंद करण्यात आला आहे. हा कालवा पुढील सुमारे ४५ दिवस बंद राहणार असल्याने शहराच्या पाणीपुरवठ्यावर मोठा परिणाम होण्याची शक्यता निर्माण झाली आहे.
सद्यस्थितीत फलटण नगरपरिषदेच्या साठवण तलावामध्ये उपलब्ध असलेला पाणीसाठा संपूर्ण शहराला पुढील ४५ दिवस नियमितपणे पुरेल इतका पुरेसा नसल्याचे प्रशासनाने स्पष्ट केले आहे. या पार्श्वभूमीवर संभाव्य पाणीटंचाई टाळण्यासाठी फलटण नगरपरिषदेने शहरात पाणी कपात लागू करण्याचा महत्त्वपूर्ण निर्णय घेतला आहे.
नगरपरिषदेने जाहीर केलेल्या नव्या वेळापत्रकानुसार गुरुवार, दिनांक १८ जून २०२६ पासून शहरात ‘एक दिवसाआड’ पाणीपुरवठा करण्यात येणार आहे. यासाठी प्रभागनिहाय स्वतंत्र वेळापत्रक तयार करण्यात आले असून नागरिकांनी त्यानुसार नियोजन करण्याचे आवाहन करण्यात आले आहे.
नगरपरिषदेच्या माहितीनुसार, पेठ सोमवार संपूर्ण भाग, पेठ मंगळवार संपूर्ण भाग तसेच पेठ महतपुरा व जिंती नाका परिसरात १८, २०, २२, २४, २६, २८ आणि ३० जून २०२६ या दिवशी पाणीपुरवठा केला जाणार आहे.
तर फलटण शहरातील उर्वरित सर्व भागांना १९, २१, २३, २५, २७ आणि २९ जून २०२६ रोजी पाणीपुरवठा करण्यात येईल. परिस्थितीनुसार पुढील महिन्यातही अशाच प्रकारचे वेळापत्रक लागू राहण्याची शक्यता व्यक्त केली जात आहे.
निरा उजवा कालवा बंद राहिल्याने निर्माण झालेली ही परिस्थिती नैसर्गिक कारणांमुळे उद्भवली असल्याचे प्रशासनाने स्पष्ट केले आहे. त्यामुळे नागरिकांनी पाणी मिळालेल्या दिवशी आवश्यक तेवढ्याच प्रमाणात साठवणूक करावी, नळांना तोट्या बसवून गळती रोखावी आणि कुठल्याही प्रकारे पाण्याचा अपव्यय होणार नाही याची दक्षता घ्यावी, असे आवाहन फलटण नगरपरिषदेचे मुख्याधिकारी निखिल जाधव यांनी केले आहे.
पुढील दीड महिना उपलब्ध पाणीसाठ्याचे योग्य नियोजन करून सर्व नागरिकांना पाणीपुरवठा सुरळीत ठेवण्याचा प्रशासनाचा प्रयत्न असल्याने नागरिकांनीही सहकार्याची भूमिका घ्यावी, असेही प्रशासनाकडून नमूद करण्यात आले आहे.
