कर्तव्यनिष्ठ शिक्षक शिवाजी बनकर यांच्या सेवापूर्ती समारंभास मान्यवरांची उपस्थिती
फलटण प्रतिनिधी : मुधोजी हायस्कूलचे उपशिक्षक शिवाजी बनकर यांच्या सेवापूर्ती समारंभाचा कार्यक्रम अत्यंत उत्साहपूर्ण आणि भावनिक वातावरणात संपन्न झाला. शिक्षण क्षेत्रातील त्यांच्या उल्लेखनीय कार्याचा गौरव करण्यासाठी फलटण एज्युकेशन सोसायटीचे आजी-माजी मुख्याध्यापक, प्राचार्य, शिक्षक तसेच विविध क्षेत्रातील मान्यवर मोठ्या संख्येने उपस्थित होते.
या कार्यक्रमास मुधोजी हायस्कूलचे माजी प्राचार्य येवले सर, माजी प्राचार्य रूपनवर सर, फलटण नगर परिषदेचे नगरसेवक विकास काकडे सर, प्राचार्य काकडे सर, माजी प्राचार्य सुधीर अहिवळे सर, प्राचार्य गगावणे सर तसेच विविध शाळांचे मुख्याध्यापक, शिक्षक, गावकरी आणि पाहुणे मंडळी उपस्थित होती.
शिवाजी बनकर यांनी आपल्या शैक्षणिक सेवेला आदरूड येथील शाळेतून उपशिक्षक म्हणून प्रारंभ केला. त्यानंतर म्हसवड तसेच फलटण येथील मुधोजी हायस्कूलमध्ये इंग्रजी व क्रीडा शिक्षक म्हणून त्यांनी अनेक वर्षे उल्लेखनीय सेवा बजावली. विद्यार्थ्यांमध्ये शिस्त, क्रीडाप्रेम, आत्मविश्वास आणि गुणवत्तापूर्ण शिक्षणाची जाणीव निर्माण करण्यासाठी त्यांनी विशेष परिश्रम घेतले.
त्यांच्या सेवाकाळात अनेक विद्यार्थ्यांनी शैक्षणिक तसेच क्रीडा क्षेत्रात उल्लेखनीय यश संपादन केले. शिक्षक म्हणून विद्यार्थ्यांशी असलेला त्यांचा जिव्हाळा, प्रामाणिकपणा, कर्तव्यनिष्ठा आणि विद्यार्थीकेंद्री दृष्टिकोन याबद्दल उपस्थित मान्यवरांनी गौरवोद्गार काढले.
कार्यक्रमात शिवाजी बनकर यांचा शाल, श्रीफळ व सन्मानचिन्ह देऊन सत्कार करण्यात आला. आपल्या मनोगतात बोलताना त्यांनी श्रीमंत शिवाजीराजे नाईक निंबाळकर व विधान परिषदेचे माजी सभापती व आमदार श्रीमंत रामराजे नाईक निंबाळकर, फलटण एज्युकेशन सोसायटीचे सचिव श्रीमंत संजीवराजे नाईक निंबाळकर तसेच कृषी उत्पन्न बाजार समितीचे सभापती श्रीमंत रघुनाथराजे नाईक निंबाळकर या राजघराण्याबद्दल कृतज्ञता व्यक्त केली.
तसेच आपल्या जीवनातील प्रेरणास्थान आणि गुरु असलेल्या मुधोजी हायस्कूलचे माजी प्राचार्य रूपनवर सर यांचे विशेष आभार त्यांनी मानले. प्राचार्य येवले सर, नगरसेवक विकास काकडे, सुधीर अहिवळे सर, उपस्थित सर्व आजी-माजी प्राचार्य, मुख्याध्यापक, शिक्षक, मित्रपरिवार आणि ग्रामस्थ यांचेही त्यांनी मनःपूर्वक आभार व्यक्त केले.
कार्यक्रमाचे सूत्रसंचालन तांबे सर यांनी केले. कार्यक्रम यशस्वी करण्यासाठी सहकार्य करणाऱ्या सर्वांचे बनकर यांनी विशेष आभार मानले. उपस्थितांनी त्यांच्या पुढील आयुष्यासाठी शुभेच्छा देत त्यांच्या कार्याला सलाम केला.
