देशहितासाठी शंभूराज देसाईंचा मोठा निर्णय : नियोजित युरोप दौरा रद्द

मुंबई :- देशातील सध्याच्या कठीण आंतरराष्ट्रीय परिस्थितीच्या पार्श्वभूमीवर पंतप्रधान नरेंद्र मोदी यांनी विदेशी चलनाची बचत करण्यासाठी अनावश्यक परदेश दौरे आणि खर्च टाळण्याचे आवाहन केले आहे. या आवाहनाला सकारात्मक प्रतिसाद देत महाराष्ट्राचे पर्यटन, खनिकर्म आणि माजी सैनिक कल्याणमंत्री तसेच सातारा जिल्ह्याचे पालकमंत्री शंभूराज देसाई यांनी आपल्या कुटुंबासोबत नियोजित असलेला युरोप दौरा रद्द करण्याचा निर्णय घेतला आहे.
मिळालेल्या माहितीनुसार, सुमारे तीन महिन्यांपूर्वी ही कौटुंबिक सहल नियोजित करण्यात आली होती. या दौऱ्यात London, Paris आणि Amsterdam या प्रमुख शहरांचा समावेश होता. कुटुंबासोबत पर्यटन आणि सुट्टीसाठी हा दौरा आखण्यात आला होता.
मात्र, देशहिताला सर्वोच्च प्राधान्य देत तसेच विदेशी चलन बचतीचा संदेश समाजापर्यंत पोहोचावा या उद्देशाने देसाई यांनी हा दौरा रद्द केल्याची माहिती समोर आली आहे.
राजकीय वर्तुळात त्यांच्या या निर्णयाचे स्वागत होत असून “देश प्रथम” या भूमिकेचे हे एक उदाहरण मानले जात आहे. वैयक्तिक आनंद आणि सुट्टीपेक्षा राष्ट्रहित अधिक महत्त्वाचे असल्याचा संदेश या निर्णयातून देण्यात आल्याची चर्चा आहे.
जबाबदारीची जाणीव, साधेपणा आणि देशहिताला प्राधान्य देत शंभूराज देसाई यांनी पंतप्रधान नरेंद्र मोदी यांच्या आवाहनाला दिलेला सकारात्मक प्रतिसाद सध्या राजकीय वर्तुळात चर्चेचा विषय ठरत असून त्यांच्या निर्णयाचे सर्व स्तरांतून कौतुक होत आहे.