फलटण : फलटण नगरपरिषदेच्या पाणीपुरवठा व जलनिस्सारण समितीची सोमवार, दि. ११ मे २०२६ रोजी आयोजित करण्यात आलेली सभा जोरदार गदारोळानंतर अखेर तहकूब करण्यात आली. अजेंड्यातील महत्त्वाच्या विषयांवर मुख्याधिकाऱ्यांची प्रशासकीय टिप्पणी आणि स्वाक्षरी नसल्याचा गंभीर आक्षेप विरोधी शिवसेनेच्या नगरसेवकांनी घेतल्याने सभागृहात सत्ताधारी आणि विरोधकांमध्ये शाब्दिक चकमक रंगली. अखेर पाणीपुरवठा सभापती राहुल निंबाळकर यांनी सभा तहकूब करण्याचा निर्णय घेतला.
सोमवारी दुपारी ३ वाजता नगरपरिषदेच्या सभागृहात ही बैठक आयोजित करण्यात आली होती. सभेसमोर एकूण २१ विषय चर्चेसाठी ठेवण्यात आले होते. मात्र कामकाज सुरू होताच विरोधी सदस्यांनी अजेंड्यावरील प्रस्तावांना प्रशासनाची तांत्रिक व आर्थिक मान्यता नसताना ते थेट समितीसमोर कसे ठेवण्यात आले, असा सवाल उपस्थित केला. मुख्याधिकाऱ्यांची कोणतीही टिप्पणी नसल्याने विरोधकांनी प्रशासन आणि सत्ताधाऱ्यांवर जोरदार टीका केली.
सभेच्या अजेंड्यावर शहरातील पाणीपुरवठ्याशी संबंधित अनेक महत्त्वाचे विषय होते. त्यामध्ये शहरातील अनधिकृत नळ जोडण्या नियमित करणे, नवीन नळजोड अर्जांवर निर्णय घेणे, विविध प्रभागांमध्ये नवीन HDPE वितरण जलवाहिन्या टाकणे, पाणीपुरवठा विभागासाठी जेसीबी भाड्याने घेणे तसेच इलेक्ट्रो फ्युजन व वेल्डिंग मशीन खरेदीचा समावेश होता. याशिवाय वितरण नलिकांच्या दुरुस्तीसाठी साहित्य खरेदी व खोदकामासाठी मनुष्यबळ वापरण्याचे प्रस्तावही प्रलंबित राहिले आहेत.
सभा तहकूब झाल्यामुळे शहरातील पाणीपुरवठ्याशी संबंधित कोट्यवधी रुपयांच्या कामांना तात्पुरता ब्रेक लागला असून अनेक प्रभागांतील नागरिकांना आता पुढील बैठकीची प्रतीक्षा करावी लागणार आहे.
दरम्यान, मुख्याधिकाऱ्यांच्या प्रशासकीय टिप्पणीशिवाय अजेंडा तयार झाल्याने नगरपरिषदेतील प्रशासन आणि पदाधिकाऱ्यांमधील समन्वयाचा अभाव पुन्हा एकदा उघड झाला असल्याची चर्चा राजकीय वर्तुळात सुरू झाली आहे. तहकूब करण्यात आलेली ही बैठक आता सभापतींच्या पुढील आदेशानुसार पुन्हा आयोजित केली जाणार असल्याचे स्पष्ट करण्यात आले आहे.
