रयत शिक्षण संस्थेच्या जनरल बॉडी सदस्यपदी दत्तात्रेय चव्हाण (तात्या) यांची निवड
फलटण : चव्हाणवाडी येथील श्री ज्योतिर्लिंग इंग्लिश स्कूलच्या स्कूल कमिटीचे ज्येष्ठ सदस्य आदरणीय श्री दत्तात्रेय बाबुराव चव्हाण (तात्या) यांची रयत शिक्षण संस्थेच्या जनरल बॉडी सदस्यपदी निवड झाल्याबद्दल विद्यालयाच्या वतीने जाहीर सत्कार करण्यात आला.
दिनांक ९ मे २०२६ रोजी कर्मवीर भाऊराव पाटील यांच्या पुण्यतिथीनिमित्त आयोजित कार्यक्रमात तात्या यांच्या निवडीबद्दल परिसरातील ग्रामस्थ, शिक्षणप्रेमी व मान्यवरांनी त्यांचे अभिनंदन करून पुढील कार्यासाठी शुभेच्छा दिल्या.
त्यानंतर ११ मे २०२६ रोजी श्री ज्योतिर्लिंग इंग्लिश स्कूल, चव्हाणवाडी येथे मुख्याध्यापक श्री विठ्ठल निकाळजे सर, त्यांचे सर्व सहकारी, मालोजीराजे विद्यालय व ज्युनिअर कॉलेजचे उपप्राचार्य श्री आबा धायगुडे सर, श्री बर्गे सर तसेच ग्रामस्थांच्या उपस्थितीत तात्या यांचा विशेष सत्कार करण्यात आला.
या कार्यक्रमास चव्हाणवाडी गावचे उपसरपंच श्री प्रशांत शिंदे, ग्रामपंचायत सदस्य श्री गोरख शिंदे, उद्योजक व कॉन्ट्रॅक्टर श्री सचिन अहिरेकर, श्री किशोर शिंदे, विद्यालयाचे ज्येष्ठ शिक्षक श्री राजेंद्र राजपुरे सर, श्री प्रदीप क्षीरसागर सर, श्री सुरेश भोईटे सर, श्री धापड सर यांच्यासह पंचक्रोशीतील ग्रामस्थ मोठ्या संख्येने उपस्थित होते.
सन १९९२ मध्ये विद्यालय स्थापनेत तात्या यांचा सिंहाचा वाटा होता. सुरुवातीच्या काळात हे हायस्कूल त्यांच्या राहत्या घरात भरत होते. त्यांनी स्वतःसाठी केवळ एक खोली ठेवून उर्वरित जागा विद्यालयासाठी उपलब्ध करून दिली. गोरगरीब शेतकरी व बहुजन समाजातील मुलांना शिक्षण मिळावे यासाठी त्यांनी व त्यांच्या कुटुंबीयांनी मोठा त्याग करत गावात रयत शिक्षण संस्थेची शाळा सुरू व्हावी यासाठी अथक परिश्रम घेतले.
याशिवाय त्यांनी स्वतःची ४० गुंठे जमीन विद्यालयाच्या बांधकामासाठी विनामोबदला संस्थेच्या नावे करून दिली. आज त्याच जागेवर विद्यालयाची भव्य इमारत उभी असून शेकडो विद्यार्थी शिक्षण घेत आहेत. कर्मवीर अण्णांनी दिलेला शिक्षणाचा वसा तात्या यांनी निस्वार्थ भावनेने जपला.
सुरुवातीच्या काळात शिक्षकांना पगार नसतानाही त्यांनी स्वतःच्या घरातील व परिसरातील लोकांकडून धान्य गोळा करून शिक्षकांची व्यवस्था केली. गोरगरीब विद्यार्थ्यांना दर्जेदार शिक्षण मिळावे यासाठी सातत्याने प्रयत्न केले.
अलीकडील काळात मुख्याध्यापक श्री विठ्ठल निकाळजे सर यांच्या नेतृत्वाखाली ग्रामस्थ, माजी विद्यार्थी व कमिन्स इंडिया कंपनीच्या CSR निधीतून विद्यालयात विविध विकासकामे करण्यात आली आहेत. यामध्ये संपूर्ण कंपाऊंड, अत्याधुनिक स्वच्छतागृहे, इमारतीचे रंगकाम, प्रत्येक वर्गात इंटरॲक्टिव्ह पॅनेल बोर्ड, पाच संगणक, एआय प्रशिक्षण वर्ग, सुसज्ज लायब्ररी, भव्य प्रयोगशाळा व पिण्याच्या पाण्याची सुविधा आदी कामांचा समावेश आहे.
विद्यालयाच्या या प्रगत स्वरूपाची आणि तात्या यांच्या त्यागमय कार्याची दखल घेत रयत शिक्षण संस्थेने त्यांची जनरल बॉडी सदस्यपदी निवड केली आहे. “स्वतः झिजून इतरांना सुगंध देणारे चंदन” अशा शब्दांत ग्रामस्थांनी त्यांच्या कार्याचा गौरव केला.
श्री ज्योतिर्लिंग इंग्लिश स्कूल, चव्हाणवाडी तसेच पंचक्रोशीतील ग्रामस्थ, सरपंच, उपसरपंच व सर्व सदस्यांच्या वतीने तात्या यांना पुढील कार्यासाठी शुभेच्छा देण्यात आल्या.
