फलटण ( साहस Times) : फलटण–पंढरपूर पालखी मार्गावरील रावरामोशी पुलाजवळ आज एका भीषण अपघाताची घटना घडली. भरधाव वेगाने जाणारी इनोव्हा कार चालकाचे नियंत्रण सुटल्याने थेट निरा उजव्या कॅनॉलमध्ये कोसळली. या अपघातामुळे परिसरात एकच खळबळ उडाली असून घटनास्थळी मोठ्या प्रमाणात नागरिकांची गर्दी जमली होती. मात्र अनेक जण फक्त बघ्याची भूमिका घेत होते.
याच दरम्यान गिरवी येथील व सध्या मुंजवडी येथे वास्तव्यास असलेले गोविंद दिलीप बोडरे हे आपल्या गावी जात असताना त्यांनी हा अपघात पाहिला. क्षणाचाही विलंब न करता त्यांनी प्रसंगाचे गांभीर्य ओळखून स्वतःच्या जीवाची पर्वा न करता थेट पाण्यात उडी घेतली.
कॅनॉलमध्ये बुडालेल्या इनोव्हा गाडीत अडकलेल्या पती–पत्नीला वाचवण्यासाठी बोडरे यांनी सर्वप्रथम गाडीची काच फोडून पतीला सुरक्षित बाहेर काढले. त्यानंतर पत्नीला बाहेर काढताना ती घाबरून बोडरे यांना घट्ट पकडत होती. मात्र मोठ्या प्रसंगावधानाने त्यांनी त्या महिलेला आपल्या पाठीवर घेऊन जोरदार प्रवाहातून तिला सुरक्षित बाहेर आणले.
अपघातातून बाहेर आल्यानंतर त्या महिलेला धक्का बसल्याने ती रडू लागली. तिने सांगितले की, “आज आम्ही आमच्या मुलांनाही सोबत घेणार होतो, पण ते घरीच राहिले. त्यामुळे त्यांचे प्राण वाचले.”
विशेष म्हणजे, इतके मोठे आणि धाडसी बचावकार्य करूनही गोविंद बोडरे यांनी कोणताही गाजावाजा न करता शांतपणे तेथून निघून जाणे पसंत केले. त्यांच्या या निस्वार्थ व धाडसी कृतीचे सर्वत्र कौतुक होत आहे.
या धाडसाबद्दल तथागत भगवान गौतम बुद्ध जयंती महोत्सव समिती, साहस क्रिडा मंडळ तसेच फलटण नगर परिषदेचे नगरसेवक विकास वसंतराव काकडे (सर) आणि साहस टाईम्स यांच्या वतीने गोविंद बोडरे यांचा विशेष सन्मान व अभिनंदन करण्यात आले.
फलटण–पंढरपूर पालखी मार्गावर भीषण अपघात; गोविंद बोडरे यांचे धाडसी बचावकार्य
