फलटण प्रतिनिधी —फलटण शहरातील विक्रम गॅस एजन्सीच्या अनियमित व निष्काळजी कारभाराचा अखेर पुरवठा विभागाने थेट पंचनामा करत कठोर दखल घेतली आहे. या प्रकरणी संबंधित एजन्सीवर तब्बल ४ लाख रुपयांचा दंड ठोठावण्यात आला असून, पुढील काळातही कारभारात सुधारणा न झाल्यास एजन्सीचा परवाना रद्द करण्याचा इशारा जिल्हा पुरवठा अधिकाऱ्यांनी दिला आहे.
सध्या युद्धजन्य परिस्थितीमुळे काही काळ गॅस पुरवठा विस्कळीत झाला होता. मात्र केंद्र सरकारच्या हस्तक्षेपामुळे पुरवठा सुरळीत होत असताना विक्रम गॅस एजन्सीसमोर ग्राहकांची प्रचंड गर्दी दिसून येत आहे. परिसरातील नागरिक २० ते २५ किलोमीटर अंतरावरून सकाळी आठ वाजल्यापासून रांगेत उभे राहत आहेत. उन्ह-पावसाची तमा न बाळगता ज्येष्ठ नागरिक, महिला आणि दिव्यांग व्यक्ती गॅस सिलेंडरसाठी दिवसन्दिवस प्रतीक्षा करत असल्याचे चित्र आहे.
ग्राहकांच्या म्हणण्यानुसार, अनेकांनी महिनाभरापूर्वी गॅस सिलेंडरची नोंदणी केली असतानाही त्यांना सिलेंडर मिळालेला नाही. याउलट काही सिलेंडर २,००० रुपयांपर्यंत जास्त दराने विक्री होत असल्याच्या तक्रारी समोर आल्या आहेत. तसेच काही सिलेंडरमधील गॅस व्यावसायिक वापरासाठी वळवला जात असल्याचेही आरोप करण्यात आले आहेत.
याशिवाय १४.५ किलो क्षमतेच्या सिलेंडरमध्ये केवळ १० किलोच गॅस भरला जात असल्याचेही आढळून आले आहे. ग्राहकांना वजन करून देण्यासही एजन्सीकडून टाळाटाळ केली जात असल्यामुळे नागरिकांमध्ये तीव्र नाराजी आहे. एजन्सीचे अधिकारी व कर्मचारी ग्राहकांशी उद्धट वर्तन करत असल्याच्या तक्रारी देखील पुढे आल्या आहेत.
या सर्व प्रकारामुळे संतप्त ग्राहकांनी बुधवार (१ एप्रिल) रोजी एजन्सी कार्यालय बंद आढळल्याने तीव्र प्रतिक्रिया व्यक्त केली. काहींनी कार्यालय पेटवण्याची धमकीही दिली. परिस्थिती गंभीर होत असल्याचे लक्षात घेऊन पुरवठा शाखेचे अधिकारी कांबळे यांनी तातडीने भेट देत एजन्सी व्यवस्थापनाला चांगलीच खरडपट्टी काढली.
दरम्यान, आधीच लावण्यात आलेला ४ लाख रुपयांचा दंड अद्याप वसूल झालेला नसून, तत्काळ सुधारणा करून ग्राहकांना नियमित गॅस पुरवठा करण्याचे लेखी आदेश देण्यात आले आहेत. अन्यथा पुढील काळात आणखी कठोर कारवाईचा इशाराही देण्यात आला आहे.
फलटणमध्ये विक्रम गॅस एजन्सीचा भोंगळ कारभार उघड; ४ लाखांचा दंड, परवाना रद्द करण्याचा इशारा
