जपानमध्ये सहलीदरम्यान धम्म उपासिका कालकथित विशाखाताई थोरात यांचे हृदयविकाराने अकस्मात निधन; आंबेडकरी चळवळीत शोककळा

जपानमध्ये सहलीदरम्यान धम्म उपासिका कालकथित विशाखाताई थोरात यांचे हृदयविकाराने अकस्मात निधन; आंबेडकरी चळवळीत शोककळा

फलटण : ठाणे जिल्ह्यातील कल्याण येथे राहणाऱ्या आंबेडकरी चळवळीतील ज्येष्ठ कार्यकर्त्या व धम्म उपासिका कालकथित विशाखाताई थोरात यांच्या अकस्मात निधनाची अत्यंत दुःखद बातमी समोर आली आहे. दि. १ एप्रिल २०२६ रोजी जपान येथे सहलीदरम्यान त्यांना हृदयविकाराचा तीव्र झटका आला आणि त्यातच त्यांचे निधन झाले.
कालकथित विशाखाताई थोरात या बुद्धभूमी फाउंडेशनच्या सभासद असून त्यांनी बुद्ध, धम्म आणि संघ यांच्याप्रती अपार श्रद्धा ठेवत आयुष्यभर सामाजिक व धार्मिक कार्यात सक्रिय सहभाग नोंदवला. धम्मप्रसार, समाजप्रबोधन आणि मानवतावादी मूल्यांची जपणूक यासाठी त्यांनी सातत्याने कार्य केले.
त्यांचा साधा, शांत आणि सेवाभावी स्वभाव सर्वांना आपलासा वाटणारा होता. त्यांनी कोणत्याही प्रकारच्या प्रसिद्धीची अपेक्षा न ठेवता निःस्वार्थ भावनेने समाजासाठी योगदान दिले. त्यांच्या धम्मनिष्ठ जीवनशैलीमुळे त्या अनेकांसाठी प्रेरणास्थान ठरल्या होत्या.
त्यांच्या या अचानक जाण्याने आंबेडकरी समाजात तसेच बुद्धभूमी परिवारात शोककळा पसरली आहे. त्यांच्या निधनामुळे समाजाची मोठी व अपूरणीय हानी झाली असल्याची भावना सर्वत्र व्यक्त होत आहे.
या दुःखद प्रसंगी थोरात कुटुंबीयांच्या दुःखात साहस Times सहभागी असून, त्यांना या कठीण काळात धैर्य व सहनशक्ती लाभो, हीच प्रार्थना व्यक्त करण्यात आली आहे. तसेच,  कालकथित विशाखाताईंना बुद्ध चरणी सुगती लाभो, अशी भावपूर्ण श्रद्धांजली अर्पण करण्यात येत आहे.
️ श्रद्धांजली संदेश
“धम्मसेवेत आयुष्य वेचलेल्या विशाखाताई थोरात यांचे जाणे ही समाजासाठी अपूरणीय हानी आहे. त्यांचे कार्य सदैव प्रेरणादायी राहील.”