Atul Parchure Death : आपल्या दमदार अभिनयाने मराठीच नव्हे, तर हिंदी मनोरंजन विश्वालाही भुरळ घालणारे अभिनेते अतुल परचुरे यांचे निधन झाले. अतुल यांच्या निधनामुळे अवघ्या मनोरंजन विश्वावर आणि त्यांच्या चाहत्यांवर शोककळा पसरली आहे. नाटक असो वा चित्रपट किंवा मालिका, अतुल परचुरे नेहमीच आपल्या अभिनयाने प्रेक्षकांच्या मनाचा ठाव घ्यायचे. पडद्यावर जसे ते हसते-खेळते होते, तसेच ते त्यांच्या खऱ्या आयुष्यात देखील नेहमीच खूप हसरे होते. मात्र, कर्करोगासारख्या आजाराने या हरहुन्नरी अभिनेत्याला बेजार करून सोडले. परंतु, अतुल परचुरे इतके जिद्दी होते की, त्यांनी कर्करोगावर देखील मात केली होती. सगळं काही पुन्हा एकदा पूर्वस्थितीत येत असताना, अचानक ५७व्या वर्षात त्यांची ही अशी एक्झिट सगळ्यांनाच चटका लावून गेली आहे.
