फलटण प्रतिनिधी :- फलटण तालुक्यातील पंचायत समितीच्या सभापती पदाच्या निवडणुकीत ओबीसी समाजासाठी आरक्षित असलेल्या पदावर अन्याय झाल्याचा आरोप करत फलटण तालुका भाजपा ओबीसी तालुका अध्यक्ष तथा विडणी गावचे लोकनियुक्त सरपंच सागर अभंग यांनी आपल्या पदाचा राजीनामा जाहीर केला आहे.
पंचायत समितीच्या सभापती पदासाठी ओबीसी समाजाला आरक्षण असतानाही ओबीसी समाजाच्या पाठीत खंजीर खुपसल्यासारखी घटना घडली असल्याचे त्यांनी सांगितले. या निवडणुकीत ओबीसी समाजावर झालेला अन्याय मन सुन्न करणारा असल्याची भावना त्यांनी व्यक्त केली.
या घटनेचा निषेध करताना सागर अभंग म्हणाले की, “मी पक्षाचा नाही तर माझ्या ओबीसी समाजाचा आहे. माझा कोणत्याही नेत्यांवर किंवा नेतृत्वावर राग नाही. मात्र, ओबीसी समाजाला सभापती पदाचे आरक्षण असतानाही अन्याय का करण्यात आला? याचे उत्तर मिळाले नाही, ही खंत आहे.”
या पार्श्वभूमीवर सभापती पदाच्या निवडीचा निषेध म्हणून आपण फलटण तालुका भाजपा ओबीसी तालुका अध्यक्ष पदाचा राजीनामा देत असल्याचे त्यांनी जाहीर केले.
ओबीसी आरक्षणावर अन्याय; फलटण तालुका भाजपा ओबीसी अध्यक्ष सागर अभंग यांचा राजीनामा
