बारामती :- बारामतीत आयोजित कृषी विज्ञान केंद्राच्या टेक्नॉलॉजी डेमोन्स्ट्रेशन प्रोजेक्टच्या उद्घाटनाच्या कार्यक्रमात राष्ट्रवादी काँग्रेसचे सर्वेसर्वा शरद पवार आणि उपमुख्यमंत्री अजित पवार हे एकाच मंचावर आले. अनेक महिन्यांनंतर हे दोघे एकत्र दिसले असले तरी, मंचावर त्यांच्या शेजारी बसण्याचे टाळले गेल्याचे विशेष लक्ष वेधून घेत आहे.
या कार्यक्रमात शरद पवार आणि अजित पवार यांनी एकमेकांजवळ बसण्याऐवजी एक खुर्चीचा अंतर ठेवत उपस्थिती नोंदवली. त्यामुळे दोघांमध्ये अजूनही राजकीय तणाव कायम असल्याचे संकेत मिळत आहेत.
कार्यक्रमाची अध्यक्षता शरद पवार यांनी केली. टेक्नॉलॉजी डेमोन्स्ट्रेशन प्रोजेक्ट अंतर्गत व्हर्चुअल रिअॅलिटी, रोबोटिक्स लॅब, सायन्स ऑन स्पिअर, होलोग्राम टेक्नॉलॉजीसारख्या अत्याधुनिक प्रकल्पांची उभारणी करण्यात आली आहे. हे प्रकल्प विद्यार्थ्यांसाठी अनुभवात्मक शिक्षणाची संधी निर्माण करणार आहेत.
राजीव गांधी सायन्स अँड टेक्नॉलॉजी कमिशन, मुंबई यांच्या सहकार्याने या प्रकल्पाची निवड करण्यात आली असून, हे राज्यातील एक पथदर्शी प्रकल्प ठरणार आहे. पुढील टप्प्यात राज्यातील इतर पाच विज्ञान केंद्रांमध्ये हे मॉडेल राबवले जाणार आहे.
या विज्ञानाच्या अधुनातन प्रयोगाशिवाय, या कार्यक्रमातील शरद पवार आणि अजित पवार यांच्या वागणुकीतून महाराष्ट्राच्या राजकारणातील आगामी घडामोडींचा संकेत दिसत आहे, हे मात्र नक्की!
