हत्या की नरबळी? पोलिसांसमोर तपासाचे मोठे आव्हान
फलटण, ता. २५: आळंदी-पंढरपूर पालखी महामार्गावर विडणी (ता. फलटण) गावच्या हद्दीत २५ फाटा येथे सापडलेल्या सडलेल्या व अर्धवट अवस्थेतील मृतदेहाची ओळख पटवण्यात पोलिसांना अद्याप यश आलेले नाही. हा खून आहे की अघोरी कृत्याद्वारे नरबळी, याबाबतही अजून स्पष्टता मिळालेली नाही. तपासाला गती देण्यासाठी सातारा जिल्हा पोलिस दलाने माहिती देणाऱ्यास १ लाख रुपयांचे बक्षीस जाहीर केले आहे.
शुक्रवार, १७ जानेवारी रोजी सकाळी १० वाजता प्रदीप महादेव जाधव यांच्या ऊसाच्या शेतात हा मृतदेह आढळून आला. घटनास्थळी तेलकट साडी, स्कार्फ, काळी बाहुली, केस, दिव्याची वात, कुंकू, गुलाल, सुरी, सत्तूर यांसारख्या वस्तू सापडल्याने हा नरबळीचा प्रकार असल्याचा संशय व्यक्त केला जात आहे. याशिवाय, मृतदेहाच्या २०० मीटर अंतरावर असलेल्या पाण्याच्या पाटात एक कवटीही आढळली, त्यामुळे चर्चेला अधिकच उधाण आले आहे.
या घटनेनंतर सातारा जिल्हा पोलिस अधीक्षक समीर शेख, अप्पर पोलिस अधीक्षक वैशाली कड्डुकर, पोलिस उपअधीक्षक राहुल धस यांनी घटनास्थळी भेट देऊन पाहणी केली. श्वानपथकाच्या मदतीने तपास राबवूनही मृतदेहाची ओळख पटवता आलेली नाही, तसेच शरीराचे इतर अवशेषही हाती लागले नाहीत.
गुन्ह्याच्या तपासासाठी बक्षीस जाहीर
या रहस्यमय घटनेची उकल करण्यासाठी सातारा जिल्हा पोलिस दलाने माहिती देणाऱ्यास १ लाख रुपयांचे बक्षीस जाहीर केले असून, माहिती देणाऱ्याचे नाव गुप्त ठेवले जाईल, असे फलटण ग्रामीण पोलिस ठाण्याचे पोलिस निरीक्षक सुनील महाडिक यांनी सांगितले.
या घटनेमुळे संपूर्ण परिसरात भीतीचे वातावरण असून हा अघोरी कृत्याचा प्रकार आहे की पूर्ववैमनस्यातून घडलेला गुन्हा, याचा छडा लावणे पोलिसांसाठी मोठे आव्हान ठरले आहे.
