फलटणच्या शनिनगर नवरात्रोत्सव मंडळाची गौरवशाली १५ वर्षांची परंपरा
फलटण, २९ सप्टेंबर – फलटण येथील शनिनगर नवरात्रोत्सव मंडळ (योद्धा ग्रुप) यांच्या वतीने आयोजित दुर्गामातेच्या भव्य विसर्जन मिरवणुकीचा शुभारंभ गुरुवार, ०२ ऑक्टोबर रोजी सायंकाळी ६ वाजता होणार आहे. विधान परिषदेचे माजी सभापती व आमदार श्रीमंत रामराजे नाईक निंबाळकर यांच्या हस्ते या मिरवणुकीच्या शुभारंभाचा सोहळा संपन्न होणार आहे, अशी माहिती मंडळाचे अध्यक्ष रोहित शिंदे यांनी दिली.
फुलांनी सजवलेल्या रथामधून दुर्गामातेची मूर्ती मिरवणुकीसाठी नेण्यात येणार असून, या प्रसंगी माजी नगरसेवक किशोरसिंह नाईक निंबाळकर, माजी नगरसेविका सौ. प्रगती कापसे व उद्योजक सत्यजीत घोरपडे यांची प्रमुख उपस्थिती राहणार आहे.
मंडळाचे संस्थापक अध्यक्ष अभिजीत जानकर यांच्या मार्गदर्शनाखाली मंडळाने यंदा १५ वर्षांचा यशस्वी वाटचाल पूर्ण केली आहे. मंडळाने पारंपरिक नागपंचमी उत्सवाची परंपरा जपतानाच, अतिवृष्टीमुळे बाधित कुटुंबांना मदत, महिलांसाठी गरबा-दांडिया, तसेच विविध सांस्कृतिक व सामाजिक उपक्रम राबवत सामाजिक बांधिलकी जपली आहे.
या विसर्जन मिरवणुकीत परिसरातील युवक, युवती व महिलांनी मोठ्या संख्येने उपस्थित राहावे, असे आवाहन मंडळाच्या वतीने करण्यात आले आहे.
