फलटण — देशभक्तीच्या गीतांनी, तिरंग्याच्या सलामीने आणि देशासाठी बलिदान दिलेल्या वीरांना स्मरून संपूर्ण फलटण शहरात ७९ वा स्वातंत्र्य दिन उत्साहात साजरा करण्यात आला. नगरपरिषदेच्या वतीने आयोजित मुख्य समारंभात सकाळी ७ वाजून २५ मिनिटांनी प्रशासक तथा मुख्याधिकारी मा. श्री. निखिल बाजीराव मोरे यांच्या हस्ते ध्वजारोहण करण्यात आले.
या वेळी फलटण नगरपरिषदेचे अधिकारी-कर्मचारी, माजी सैनिक, वीरपत्नी, शिक्षक, प्राध्यापक, विद्यार्थी, व्यापारी बांधव, नागरिक आणि सामाजिक संस्थांचे प्रतिनिधी मोठ्या संख्येने उपस्थित होते. राष्ट्रध्वजाला सलामी देऊन राष्ट्रगीत व राज्यगीत वाजविण्यात आले.
मुख्याधिकारी मोरे यांनी आपल्या भाषणात स्वातंत्र्य संग्रामातील महापुरुषांना आदरांजली वाहून, त्यांच्या उदात्त आदर्शांचे पालन करण्याचे आवाहन केले. देशाची एकता व अखंडता अबाधित राखण्यासाठी नागरिकांनी सदैव जागरूक राहावे असे त्यांनी सांगितले.
स्वातंत्र्य दिनानिमित्त नगरपरिषदेच्या वतीने वृक्षारोपण करण्यात आले. यावेळी पर्यावरण संवर्धनाचे महत्व अधोरेखित करून सर्वांनी वृक्षलागवड करावी, हे आपले मुलभूत कर्तव्य असल्याचे मा. मोरे यांनी नमूद केले.
समारंभात विद्यार्थ्यांनी देशभक्तीपर गाणी व भाषणे सादर केली. नगरपरिषद शासकीय इमारतीवर आकर्षक रोषणाई करण्यात आली, शहरभर देशभक्तीपर गाणी वाजविण्यात आली तसेच अधिकारी-कर्मचारी यांनी ‘ऑपरेशन सिंदूर’ या नाटकाचे सादरीकरण करून प्रेक्षकांना भारावून टाकले.
