फलटण (प्रतिनिधी) – डॉ. बाबासाहेब आंबेडकर स्मृती भवन (समाज मंदिर), मंगळवार पेठ, फलटण या ऐतिहासिक व सामाजिकदृष्ट्या महत्त्वाच्या वास्तूची तातडीने दुरुस्ती व देखभाल करण्यात यावी, अशी मागणी लुंबिनी बहुद्देशीय संस्थेच्यावतीने लेखी निवेदनाद्वारे करण्यात आली आहे.
या निवेदनात समाज मंदिरात पूर्वीप्रमाणे ज्येष्ठ नागरिकांसाठी वर्तमानपत्र वाचनालय सुरू करणे, तसेच आंबेडकर वाचनालयातील खिडक्यांना साउंडप्रूफ ग्लास आणि मजबूत ग्रील बसविणे, यासारख्या महत्त्वाच्या सुविधा पुरविण्याची मागणी करण्यात आली आहे.
हे निवेदन लुंबिनी बहुद्देशीय संस्थेचे संस्थापक कुणाल किशोर काकडे व ॲड. सुरज काकडे यांच्या नेतृत्वाखाली संस्थेच्या इतर पदाधिकाऱ्यांनी फलटण नगरपरिषदेचे मा. मुख्याधिकारी मोरे साहेब यांना सादर केले.
मुख्याधिकारी मा. मोरे साहेबांनी या मागण्यांची गंभीर दखल घेत त्वरित कामे हाती घेण्याची ग्वाही दिली, असे संस्थेच्या प्रतिनिधींनी सांगितले.
स्थानिक नागरिकांतून या उपक्रमाचे स्वागत करण्यात येत असून, स्मृती भवनाच्या सुधारित सुविधांमुळे सामाजिक उपक्रम अधिक प्रभावीपणे राबवता येणार असल्याचा विश्वास व्यक्त केला जात आहे.
