फलटण प्रतिनिधी : फलटण तालुक्यातील मराठा समाजासाठी आज, बुधवार दि. १८ मार्च २०२६ रोजी सायंकाळी ६:३० वाजता एक महत्त्वपूर्ण बैठक आयोजित करण्यात आली आहे. मराठा क्रांती मोर्चा मध्यवर्ती कार्यालय, फलटण येथे होणाऱ्या या बैठकीस तालुक्यातील सर्व मराठा बांधवांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.
अलीकडेच पार पडलेल्या पंचायत समिती निवडणुकीत कुणबी मराठा समाजाचे प्रतिनिधित्व करत कु. शिवाजंली भोसले या सभापतीपदी निवडून आल्या आहेत, तर अमोल दशरथ सस्ते यांनी उपसभापती पदाची धुरा सांभाळली आहे. त्यांच्या या निवडीच्या पार्श्वभूमीवर बैठकीदरम्यान दोन्ही मान्यवरांचा सत्कार समारंभ आयोजित करण्यात आला आहे.
या बैठकीत स्थानिक राजकीय घडामोडींचा आढावा घेण्यात येणार असून, मराठा समाजासमोरील विविध प्रश्नांवर सखोल चर्चा होणार आहे. तसेच आगामी काळातील धोरणात्मक भूमिका, संघटनात्मक बळकटीकरण आणि समाजाच्या एकजुटीसाठी आवश्यक पावले याबाबतही विचारविनिमय करण्यात येणार आहे.
मराठा समाजाच्या भविष्यासाठी दिशा ठरवणारी ही बैठक महत्त्वाची मानली जात असून, सर्व समाजबांधवांनी सक्रिय सहभाग नोंदवून बैठकीस यशस्वी करावे, असे मराठा क्रांती मोर्चाच्या वतीने आवाहन करण्यात आले आहे.
फलटणमध्ये मराठा समाजाची महत्त्वपूर्ण बैठक आज; नव्या पदाधिकाऱ्यांचा सत्कार व भविष्यातील धोरणांवर चर्चा
