अकलूज | प्रतिनिधी. अकलूज-महाळुंग रोड परिसरात सुरू असलेल्या कथित हायप्रोफाईल देहव्यापाराविरोधात सोलापूर ग्रामीण पोलिसांच्या अनैतिक मानवी वाहतूक प्रतिबंधक कक्ष (AHTU) आणि अकलूज पोलिसांनी संयुक्तपणे मोठी कारवाई करत दोन वेगवेगळ्या ठिकाणी छापे टाकले. ७ जुलै रोजी करण्यात आलेल्या या धडक कारवायांमध्ये तीन पीडित महिलांची सुटका करण्यात आली असून, दोन लॉज मालक आणि दोन व्यवस्थापक अशा चार आरोपींना अटक करण्यात आली आहे. या कारवाईमुळे अकलूज परिसरात मोठी खळबळ उडाली आहे.
खाजगी इमारतीवर छापा; दोन महिलांची सुटका
अकलूज-महाळुंग रोडवरील एका खाजगी इमारतीत महिलांकडून देहव्यापार करून घेतला जात असल्याची गोपनीय माहिती AHTU पथकाला मिळाली होती. त्यानुसार पोलिसांनी सापळा रचत एका बनावट ग्राहकाला २,००० रुपयांच्या चिन्हांकित नोटा देऊन संबंधित ठिकाणी पाठवले. व्यवहार निश्चित झाल्यानंतर मिळालेल्या संकेतावरून पोलिसांनी सायंकाळी सुमारे ५.०५ वाजता छापा टाकला.
कारवाईदरम्यान इमारतीतील दोन खोल्यांमधून दोन महिलांची सुटका करण्यात आली. प्राथमिक चौकशीत त्यांना पैशांचे आमिष दाखवून देहव्यापारासाठी आणल्याचे समोर आले. यापैकी एक महिला नवी मुंबई तर दुसरी पुणे येथील रहिवासी असल्याचे पोलिसांनी सांगितले.
या प्रकरणात लॉज मालक विनायक काशिनाथ आडत (वय ४०) आणि व्यवस्थापक महादेव आप्पा चौधरी (वय ३९) यांना अटक करण्यात आली. पोलिसांनी २,००० रुपयांच्या चिन्हांकित नोटा, दोन मोबाईल फोन आणि इतर साहित्य असा सुमारे २२ हजार रुपयांचा मुद्देमाल जप्त केला.
‘लयभारी लॉजिंग’वर मध्यरात्री धाड
याच दिवशी रात्री अकलूज-महाळुंग रोडवरील बडेनगर परिसरातील ‘लयभारी लॉजिंग’मध्ये महिलांना बेकायदेशीररीत्या ठेवून देहव्यापार चालवला जात असल्याची माहिती पोलिसांना मिळाली. त्यानुसार महिला सहाय्यक पोलीस फौजदार सविता कोकणे आणि पोलीस निरीक्षक दीपक भिताडे यांच्या मार्गदर्शनाखाली संयुक्त पथकाने कारवाई केली.
पोलिसांनी बनावट ग्राहकाला १,५०० रुपयांच्या चिन्हांकित नोटा देऊन लॉजमध्ये पाठवले. व्यवहार निश्चित होताच रात्री सुमारे ११ वाजता छापा टाकण्यात आला.
या कारवाईत एका ३५ वर्षीय महिलेची सुटका करण्यात आली. तिला स्वयंपाकाच्या कामाचे आमिष दाखवून बोलावण्यात आले होते. मात्र, नंतर तिच्यावर जबरदस्तीने देहव्यापार करण्यासाठी दबाव टाकला जात असल्याचे तपासात निष्पन्न झाले.
या प्रकरणात लॉज मालक हेमंत नामदेव बडे (वय ५६) आणि व्यवस्थापक सचिन राजाराम बनसोडे (वय ३५) यांना अटक करण्यात आली. पोलिसांनी १,५०० रुपयांच्या चिन्हांकित नोटा, दोन मोबाईल फोन आणि इतर साहित्य असा सुमारे २१,५०० रुपयांचा मुद्देमाल जप्त केला.
दोन्ही प्रकरणांमध्ये गुन्हे दाखल
दोन्ही कारवायांप्रकरणी संबंधित आरोपींविरुद्ध भारतीय न्याय संहिता (BNS) मधील लागू तरतुदी तसेच अनैतिक मानवी व्यापार (प्रतिबंध) कायदा (PITA) अंतर्गत गुन्हे दाखल करण्यात आले आहेत. सुटका करण्यात आलेल्या महिलांना आवश्यक संरक्षण व मदत उपलब्ध करून देण्यात आली असून, या प्रकरणांचा पुढील तपास अकलूज पोलीस करत आहेत.
अकलूज परिसरातील बेकायदेशीर लॉजिंग व देहव्यापाराच्या अड्ड्यांवर करण्यात आलेल्या या सलग कारवायांमुळे अशा बेकायदेशीर व्यवसाय करणाऱ्यांमध्ये मोठी दहशत निर्माण झाली असून, अशा प्रकारच्या कारवाया पुढेही सुरू राहणार असल्याचे पोलिसांकडून स्पष्ट करण्यात आले आहे.
