फलटण | 29 जून 2025
श्री संत ज्ञानेश्वर माऊलींचा पालखी सोहळा फलटण मुक्कामी असताना संपूर्ण शहर भक्तिरसात न्हालं आहे. आळंदीहून पंढरपूरकडे प्रस्थान करणाऱ्या माऊलींच्या पालखीचे स्वागत करताना, वारकऱ्यांच्या सेवेसाठी शहर आणि तालुक्यातील विविध संस्था, संघटना आणि नागरिक पुढे सरसावले आहेत.
फलटण शहरात विविध ठिकाणी मोफत आरोग्य तपासणी शिबिरे, भोजन, अल्पोपहार आणि जीवनावश्यक वस्तूंचे वाटप यासारखे उपक्रम राबवण्यात आले. या सेवाकार्यात सहभागी होताना जिल्हा नियोजन समितीच्या सदस्या अॅड. सौ. जिजामाला रणजितसिंह नाईक निंबाळकर म्हणाल्या, “शेकडो किलोमीटर पायी चालणाऱ्या वारकऱ्यांची सेवा करण्याची संधी मिळणे, हीच मोठी भाग्याची गोष्ट आहे.“
या उपक्रमांच्या उद्घाटनप्रसंगी आमदार सचिन पाटील, स्वराज पतसंस्थेचे चेअरमन अभिजीत नाईक निंबाळकर, माजी नगराध्यक्ष दिलीपसिंह भोसले, माजी नगरसेवक अशोकराव जाधव, भाजपा जिल्हा उपाध्यक्ष संदीप चोरमले, अमोल सस्ते, राष्ट्रवादीच्या महिला तालुकाध्यक्ष सौ. प्रतिभा चेतन शिंदे, सद्गुरू पतसंस्थेचे चेअरमन तेजसिंह भोसले, भाजपाचे तालुकाध्यक्ष बापूराव शिंदे आणि युवा नेते अमित भोईटे यांच्यासह अनेक मान्यवरांची उपस्थिती होती.
विशेष म्हणजे, अॅड. जिजामाला निंबाळकर यांनी वारकऱ्यांबरोबर खेळांचा आनंदही घेतला, जे उपस्थितांसाठी एक प्रेरणादायी क्षण ठरला.
