बारामती प्रतिनिधी :- बारामती तालुक्यातील श्री सोमेश्वर सहकारी साखर कारखान्याने देशपातळीवर आपली वेगळी ओळख निर्माण केली आहे. राष्ट्रीय सहकारी साखर संघ (NSSFF) यांच्यावतीने देण्यात येणारा ‘सर्वोत्कृष्ट सहकारी साखर कारखाना’ हा मानाचा पुरस्कार गाळप हंगाम २०२३-२४ मध्ये उत्कृष्ट उत्पादन, आर्थिक आणि तांत्रिक कामगिरीबद्दल सोमेश्वर कारखान्याला जाहीर झाला आहे.
हा पुरस्कार डॉ. बाबासाहेब आंबेडकर इंटरनॅशनल सेंटर, दिल्ली येथे आयोजित कार्यक्रमात प्रदान करण्यात आला. यावेळी केंद्रीय अन्न व नागरी पुरवठा मंत्री प्रल्हाद जोशी, केंद्रीय राज्यमंत्री निमुबेन बंगानिया, माजी केंद्रीय मंत्री सुरेश प्रभू, राष्ट्रीय सहकारी साखर संघाचे अध्यक्ष हर्षवर्धन पाटील, तसेच व्यवस्थापकीय संचालक प्रकाश नाईकनवरे यांची उपस्थिती होती.
पुरस्कार स्विकारताना सोमेश्वर कारखान्याचे अध्यक्ष पुरुषोत्तम जगताप, उपाध्यक्ष मिलिंद कांबळे, सर्व संचालक मंडळ, कार्यकारी संचालक व अधिकारी यांनी एकत्रितपणे सहभाग घेतला. हा पुरस्कार मिळणे हे आमच्यासाठी अत्यंत अभिमानास्पद असून, वसंतदादा शुगर इन्स्टिट्यूट कडून मिळालेल्या चार पुरस्कारांनंतर हा पहिलाच राष्ट्रीय सन्मान असल्याचे अध्यक्ष जगताप यांनी सांगितले.
ते पुढे म्हणाले, “उपमुख्यमंत्री अजितदादा पवार यांचे वेळोवेळी मिळालेले मार्गदर्शन, तसेच कारखान्यातील सर्व अधिकारी, कर्मचारी आणि सभासद यांचे सहकार्य यामुळेच हे यश शक्य झाले आहे. आगामी काळातही ग्रामीण अर्थव्यवस्थेच्या विकासासाठी कारखाना नावीन्यपूर्ण उपक्रम राबवेल,” असा विश्वासही त्यांनी व्यक्त केला.
