आदर्की खुर्द (ता. फलटण) – प्रेमप्रकरणातील बदनामीच्या रागातून एका व्यक्तीचा निर्घृण खून केल्याची धक्कादायक घटना आदर्की खुर्द (ता. फलटण) येथे घडली आहे. याप्रकरणी लोणंद पोलिसांनी दोन जणांविरुद्ध खूनाचा गुन्हा दाखल केला असून, एका आरोपीला अटक करण्यात आली आहे, तर मुख्य आरोपी फरार आहे.
घटनाक्रम:
लोणंद पोलिसांकडून मिळालेल्या माहितीनुसार, आदर्की खुर्द येथील दत्तात्रेय उर्फ काका व्यंकट निंबाळकर याच्या प्रेमसंबंधांबाबत गावातीलच रत्नशिव निंबाळकर हा बदनामी करत असल्याचा संशय आरोपी दत्तात्रेयला होता. या रागातून त्याने आपल्या साथीदार विनोद महादेव राक्षेच्या मदतीने रत्नशिव निंबाळकरच्या हत्या करण्याचा कट रचला.
ता. १२ रोजी सकाळी सव्वा दहा वाजता आदर्की बुद्रूक ते आदर्की खुर्द मार्गावर, राजेंद्र भालेराव जाधव यांच्या बांधकाम सुरू असलेल्या घरासमोर आरोपींनी रत्नशिवच्या दुचाकीला (MH-47-V-0549) पाठीमागून कार (MH-26-BX-6546) ने जोरदार धडक देऊन तोल जाऊन पडण्यास भाग पाडले. अपघातानंतर विनोद राक्षेने रत्नशिवला धरून ठेवले, तर दत्तात्रेय उर्फ काका निंबाळकरने धारदार कोयत्याने त्याच्या डोक्यावर आणि हातावर सपासप वार करून त्याचा निर्घृण खून केला.
या घटनेबाबत मृत रत्नशिव निंबाळकर यांचा भाऊ कमलेश संभाजी निंबाळकर (वय ३६, रा. आदर्की खुर्द) यांनी लोणंद पोलिस ठाण्यात फिर्याद दिली आहे.
पोलिस तपास व कारवाई:
लोणंद पोलिसांनी तातडीने गुन्हा दाखल करून आरोपी विनोद महादेव राक्षे यास अटक केली आहे. त्याला आज फलटण न्यायालयात हजर करण्यात आले असता न्यायालयाने त्याला २५ मार्चपर्यंत पोलिस कोठडी सुनावली. दरम्यान, मुख्य आरोपी दत्तात्रेय उर्फ काका निंबाळकर फरार असून, त्याचा शोध सुरू आहे.
घटनास्थळी फलटण उपविभागीय पोलिस अधिकारी राहुल धस यांनी भेट दिली असून, पुढील तपास लोणंद पोलिस ठाण्याचे सहाय्यक पोलिस निरीक्षक सुशिल भोसले करत आहेत.
