संजीवराजे आणि रघुनाथराजे नाईक निंबाळकर यांच्या घरांवर आयकर विभागाचे छापे
सातारा – जिल्ह्याच्या राजकारणात खळबळ उडवणारी घटना आज सकाळी घडली आहे. माजी सभापती रामराजे नाईक निंबाळकर यांचे चुलत बंधू संजीवराजे नाईक निंबाळकर आणि रघुनाथराजे नाईक निंबाळकर यांच्या घरांवर सकाळी सहा वाजल्यापासून आयकर विभागाच्या पथकाने छापे टाकले आहेत.
संजीवराजे नाईक निंबाळकर हे लवकरच अजित पवार यांच्या राष्ट्रवादी काँग्रेसमध्ये प्रवेश करणार असल्याची चर्चा होती. मात्र, या प्रवेशाआधीच ही मोठी कारवाई झाली आहे. आयकर विभागाचे अधिकारी संजीवराजे यांच्या घरात चौकशी करत असून, बाहेरील व्यक्तींना प्रवेश नाकारण्यात आला आहे.
रघुनाथराजे नाईक निंबाळकर यांची प्रतिक्रिया:
“माझ्या आणि संजीवराजे यांच्या घरावर छापे टाकले आहेत. मी पुण्यात होतो, आता फलटणमध्ये पोहोचलो आहे. आत जाण्याची परवानगी मिळण्याची अपेक्षा आहे. आम्ही कुठल्याही गैरकारभारात नाही, आमच्याकडे काहीही वेडवाकडं सापडणार नाही. हे केवळ तपास प्रक्रियेचा भाग असावा. इतकी वर्षे राजकारणात आहोत, आजोबा देखील मंत्री होते, पण अशा प्रकारची घटना कधीच घडली नव्हती,” असे रघुनाथराजे यांनी सांगितले.
सत्ताधाऱ्यांची साथ सोडल्यामुळे ही कारवाई झाली का, असा प्रश्न विचारता त्यांनी स्पष्टपणे नकार दिला. “असे काही वाटत नाही, कदाचित ही केवळ प्रक्रियेचा भाग असावा,” असे त्यांनी नमूद केले.
राजकीय हालचालींना वेग:
संजीवराजे यांचा राष्ट्रवादी काँग्रेसमध्ये प्रवेश निश्चित मानला जात होता. प्रदेशाध्यक्ष सुनील तटकरे आणि राज्यसभा खासदार नितीन पाटील यांच्यासोबत चर्चा झाल्यानंतर अंतिम निर्णय होणार होता. मात्र, आयकर छाप्यांमुळे या घडामोडींना वेगळे वळण मिळाले आहे.
