जिंती (ता. फलटण), दि. १४: जिंती गावात प्रामाणिकपणाचा आदर्श घालून देणारी घटना घडली. प्रल्हाद मारुती रणवरे यांना सकाळी ११.३० च्या सुमारास त्यांच्या घरासमोरील डांबरी रस्त्यावर एक प्लॅस्टिक पिशवी सापडली. या पिशवीत एक तोळ्याचे सोन्याचे गंठण, चांदीच्या पायपट्ट्या, सहा वारी साडी आणि तंबाखूची पिशवी होती.
रणवरे कुटुंबातील प्रल्हाद रणवरे, त्यांचा मुलगा गणेश रणवरे व भावकीतील दिलीप सदाशिव रणवरे यांनी प्रामाणिकपणे ती पिशवी फलटण ग्रामीण पोलीस ठाण्यात आणून जमा केली. पोलीस निरीक्षक सुनील महाडिक यांनी गहाळ वस्तूंच्या ओळखीबाबत आवाहन केले. त्यानुसार, या वस्तू रावडी खुर्द (ता. फलटण) येथील बाळकृष्ण होळकर यांच्या असल्याचे निष्पन्न झाले.
फलटण ग्रामीण पोलीस ठाण्यात प्रल्हाद रणवरे यांच्या हस्ते या वस्तू मूळ मालक बाळकृष्ण होळकर यांना सुपूर्द करण्यात आल्या. रणवरे कुटुंबाच्या प्रामाणिकपणाबद्दल त्यांचा पोलीस निरीक्षक सुनील महाडिक यांच्या हस्ते शाल, श्रीफळ, व पुष्पगुच्छ देऊन सत्कार करण्यात आला. यावेळी पोलीस उपनिरीक्षक मोहन हांगे, पो हवा वैभव सूर्यवंशी, म पो हवा उर्मीला पेंदाम, पो ना अमोल जगदाळे, गणेश रणवरे, दिलीप रणवरे आणि सस्तेवाडी गावचे पोलीस पाटील सस्ते उपस्थित होते.
