मुंबई – अनुसूचित जातींसाठी राखीव असलेल्या निधीवर पुन्हा एकदा सरकारने घाला घातला आहे. राज्य सरकारने ‘लाडकी बहीण’ योजनेसाठी अनुसूचित जातींच्या अर्थसंकल्पीय निधीतील तब्बल ४१०.३० कोटी रुपये वळवले असून, यामुळे संतप्त झालेल्या वंचित बहुजन युवा आघाडीने थेट राज्यपाल आणि राष्ट्रपतींकडे ई-मेलद्वारे तक्रार दाखल केली आहे.
याआधीच सरकारने सामाजिक न्याय विभागाचे ३ हजार कोटी आणि आदिवासी विकास विभागाचे ४ हजार कोटी रुपये लाडकी बहीण योजनेसाठी वापरले होते. या पार्श्वभूमीवर पुन्हा निधी हस्तांतर केल्याने सरकारचा जातीयवादी चेहरा स्पष्ट झाल्याचा आरोप वंचित बहुजन युवा आघाडीने केला आहे.
या संदर्भातील शासन निर्णय अवर सचिव प्रसाद कुलकर्णी यांच्या स्वाक्षरीने निर्गमित करण्यात आला असून, संबंधित निधी महिला व बालकल्याण विभागाकडे वर्ग करण्यात आला आहे. वंचित बहुजन युवा आघाडीचे प्रदेश महासचिव राजेंद्र पातोडे यांनी हे पैसे परत मिळावेत म्हणून उग्र भूमिका घेतली आहे.
