सोलापूर: जिल्हा विकास समन्वय व सनियंत्रण समितीची (दिशा) बैठक सोलापूर येथे खासदार प्रणिती शिंदे यांच्या अध्यक्षतेखाली आणि सह-अध्यक्ष खासदार धैर्यशील मोहिते-पाटील यांच्या प्रमुख उपस्थितीत पार पडली. या बैठकीत केंद्र सरकारच्या विविध योजनांचा आढावा घेत प्रलंबित कामे मार्गी लावण्याच्या सूचना संबंधित विभागांना देण्यात आल्या.
बैठकीत प्रधानमंत्री ग्रामसडक योजना, प्रधानमंत्री फसल बीमा योजना, राष्ट्रीय पेयजल योजना, प्रधानमंत्री कृषी सिंचन योजना, प्रधानमंत्री आवास योजना (मिशन), स्वच्छ भारत मिशन (शहर), जलजीवन मिशन, एकात्मिक बाल विकास योजना, सर्व शिक्षा अभियान, राष्ट्रीय आरोग्य अभियान आणि महात्मा गांधी राष्ट्रीय ग्रामीण रोजगार हमी योजना यांसारख्या महत्त्वाच्या योजनांच्या कार्यवाहीचा सविस्तर आढावा घेण्यात आला. सोलापूर जिल्ह्यात या योजनांची प्रभावी अंमलबजावणी होण्यासाठी अधिकाऱ्यांना आवश्यक निर्देश देण्यात आले.
या बैठकीत जिल्ह्याच्या सर्वांगीण विकासासाठी स्थानिक प्रशासन व लोकप्रतिनिधी यांच्या माध्यमातून प्रभावी कार्यवाही करण्यावर भर देण्यात आला. जिल्ह्यातील मूलभूत सुविधांच्या विकासासाठी आणि प्रलंबित कामे पूर्ण करण्यासाठी सखोल चर्चा झाली.
बैठकीस खा. ओमराजे निंबाळकर, आमदार राजू खरे, आमदार अभिजीत पाटील, आमदार डॉ. बाबासाहेब देशमुख, आमदार नारायण पाटील, सोलापूर जिल्हाधिकारी, सोलापूर मनपा आयुक्त, जिल्हा परिषद मुख्य कार्यकारी अधिकारी तसेच विविध शासकीय विभागांचे वरिष्ठ अधिकारी उपस्थित होते.
