पुणे : संपूर्ण राज्याला हादरवून सोडणाऱ्या बोपदेव घाटातील महाविद्यालयीन तरुणीवरील सामूहिक बलात्कार प्रकरणात फरार असलेला सूरज उर्फ बापू गोसावी (रा. भवानीनगर, ता. इंदापूर, जि. पुणे) अखेर पोलिसांच्या जाळ्यात सापडला आहे. शनिवारी दुपारी अकलूज येथील एसटी स्थानक परिसरातून त्याला ताब्यात घेण्यात आले असून, काल रात्री उशीरा त्याचा ताबा पुणे पोलिसांकडे सोपवण्यात आला आहे.
३ ऑक्टोबर २०२४ रोजी बोपदेव घाटातील टेबल पॉईंट परिसरात फिरायला गेलेल्या तरुणीसह तिच्या मित्रावर कोयत्याचा धाक दाखवत हल्ला करून तरुणीवर सामूहिक बलात्कार करण्यात आला होता. या अमानुष घटनेनंतर संपूर्ण महाराष्ट्रात तीव्र संताप व्यक्त करण्यात आला होता. या प्रकरणात रवींद्रकुमार कनोजिया आणि अख्तर अली शेख या दोघांना तत्काळ अटक करण्यात पोलिसांना यश आले होते, मात्र सूरज गोसावी हा घटनेनंतर फरार झाला होता.
गोसावी याचा शोध घेण्यासाठी पोलिसांनी ६० विशेष पथके तयार केली होती आणि सुमारे ४५० सराईत गुन्हेगारांची चौकशी केली होती. विविध ठिकाणच्या सीसीटीव्ही फुटेजचीही बारकाईने तपासणी करण्यात आली होती. सूरज गोसावी हा सतत ठिकाणं आणि नाव बदलत असल्याने पोलिसांना त्याचा माग काढण्यात मोठ्या अडचणी येत होत्या.
दरम्यान, वालचंदनगर पोलिस ठाण्याचे सहाय्यक पोलिस निरीक्षक राजकुमार डुणगे यांना गोपनीय माहिती मिळाली की, सूरज गोसावी अकलूज येथे येणार आहे. त्यांनी तत्काळ सापळा रचून त्याला ताब्यात घेतले आणि पुढील कारवाईसाठी पुणे पोलिसांच्या हवाली केले.
या कारवाईमुळे पोलिस दलाने एक मोठा दिलासा घेतला आहे तर या प्रकरणात न्याय मिळवण्यासाठी एक महत्त्वपूर्ण पाऊल उचलले गेले आहे.
