फलटण प्रतिनिधी :- फलटण नगरपरिषद निवडणुकीच्या पार्श्वभूमीवर राजे गटातील गळतीचे सत्र सुरूच असून, आज पुन्हा दोन महत्त्वाच्या नेत्यांनी गटाला रामराम केला आहे. राज्य शासनाच्या क्रीडा विभागाचे माजी उपसंचालक अनिल मारुतराव चोरमले आणि स्थानिक राजकारण व समाजकारणात सक्रिय असलेले संभाजी साहेबराव चोरमले यांनी शेकडो कार्यकर्त्यांसह भारतीय जनता पक्षात जाहीर प्रवेश केला.
माजी खासदार रणजितसिंह नाईक निंबाळकर यांच्या नेतृत्वाखाली हा प्रवेश सोहळा पार पडला. यावेळी ज्येष्ठ नेते व माजी नगराध्यक्ष सोमशेठ जाधव प्रमुख उपस्थित होते. नाईक निंबाळकर यांनी दोन्ही नेत्यांचे आणि त्यांच्या समर्थकांचे पक्षात स्वागत केले.
अनिल चोरमले यांचा प्रशासकीय अनुभव, क्रीडा विभागातील कारकीर्द आणि सामाजिक क्षेत्रातील मजबूत जनसंपर्क महायुतीच्या ताकदीत भर घालणारा ठरत आहे. संभाजी चोरमले यांचाही स्थानिक राजकारणातील सक्रिय सहभाग महत्त्वाचा असल्याने त्यांच्या प्रवेशाला विशेष वजन प्राप्त झाले आहे.
गेल्या काही दिवसांत राजे गटातील अनेक दिग्गज, माजी नगराध्यक्ष आणि सुकाणू समिती सदस्य महायुतीत सामील झाले आहेत. आता चोरमले बंधूंसह आणखी दोन प्रभावी नेते गट सोडून गेल्याने राजे गटासमोरील अडचणी वाढल्याचे राजकीय वर्तुळात बोलले जात आहे.
अनिल चोरमले यांनी विकासाच्या मुद्द्यावर आणि सक्षम नेतृत्वाच्या विश्वासावरून भाजपमध्ये प्रवेश केल्याचे सांगितले. आगामी काळात पक्ष संघटन मजबुतीसाठी जोमाने काम करण्याची ग्वाही त्यांनी दिली.
या प्रवेशामुळे संबंधित प्रभागातील राजकीय समीकरणांत बदल होणार असून महायुतीला त्याचा फायदा मिळेल, असा विश्वास सोमशेठ जाधव यांनी व्यक्त केला. शेकडो कार्यकर्त्यांच्या उपस्थितीमुळे प्रवेश सोहळ्याला भव्य शक्तीप्रदर्शनाचे रूप आले होते.
