फलटण (प्रतिनिधी): रस्त्यावरून वेगाने दुचाकी चालवण्याबाबत जाब विचारल्याचा राग मनात धरून गॅरेज मालक आणि त्यांच्या भावावर लाकडी दांडक्याने गंभीर मारहाण करणाऱ्या टोळीतील आरोपींना फलटण शहर पोलिसांनी अटक केली आहे. या प्रकरणात काही अल्पवयीन मुलांचाही सहभाग असल्याचे निष्पन्न झाले असून पोलिसांनी चार मुख्य आरोपींसह तीन विधीसंघर्षित बालकांना ताब्यात घेतले आहे.
नेमकी घटना काय?
ही घटना २२ फेब्रुवारी २०२६ रोजी रात्री सुमारे ९.३० वाजण्याच्या सुमारास घडली. अनिल विठ्ठल हिरणवाळे हे शंकर मार्केट येथील त्यांचे गॅरेज बंद करून बाहेर थांबले होते. त्याचवेळी गोसावी गल्ली परिसरातील ७ ते ८ तरुण दुचाकींवरून मोठा आवाज करत आणि अतिवेगाने त्या ठिकाणाहून जात होते.
यावेळी अनिल हिरणवाळे यांनी त्यांना “एवढ्या वेगाने गाड्या का चालवता? कुणाला तरी धडक लागेल,” असे सांगत समज दिली.
मात्र ही समज टोळीला मान्य झाली नाही. या कारणाचा राग मनात धरून काही वेळाने संशयित आरोपी पुन्हा त्या ठिकाणी आले आणि अनिल हिरणवाळे तसेच त्यांचे भाऊ संतोष हिरणवाळे यांच्यावर लाकडी दांडक्याने आणि हाताने बेदम मारहाण केली. या हल्ल्यात अनिल हिरणवाळे गंभीर जखमी झाले.
पोलिसांत गुन्हा दाखल
या घटनेप्रकरणी फलटण शहर पोलीस ठाण्यात गुन्हा रजिस्टर क्रमांक ५८/२०२६ नुसार विविध कलमान्वये गुन्हा दाखल करण्यात आला. हल्ल्यानंतर आरोपी फरार झाले होते. मात्र पोलिसांनी तातडीने तपास सुरू करत आरोपींचा शोध घेऊन अटक सत्र सुरू केले.
आरोपींना अटक
पोलिसांनी या प्रकरणात पुढील आरोपींना अटक केली आहे:
संदीप विठ्ठल जाधव (वय २०)
सुनील उर्फ सतिश राजू मोरे (वय २०) – यांना २४ फेब्रुवारी रोजी अटक
गणेश अजय जाधव (वय १८) – याला ६ मार्च रोजी अटक करून ११ मार्चपर्यंत पोलीस कोठडी सुनावली
प्रशांत सुनील जुवेकर (वय २१) – याला ९ मार्च रोजी अटक करून पोलीस कोठडीत रवानगी
याशिवाय या गुन्ह्यात सहभागी असलेल्या तीन विधीसंघर्षित बालकांना देखील पोलिसांनी ताब्यात घेऊन सातारा येथील बाल न्यायमंडळासमोर हजर केले आहे.
पोलिसांचा इशारा
या प्रकरणाचा पुढील तपास पोलीस उपनिरीक्षक दिनेश शिंदे करत आहेत. शहरातील नागरिक, व्यापारी तसेच सामान्य जनतेला त्रास देणाऱ्या गुंड प्रवृत्तीच्या व्यक्तींवर कडक कारवाई करण्यात येईल, असा इशारा फलटण शहर पोलीस ठाण्याचे पोलीस निरीक्षक अरविंद काळे यांनी दिला आहे.
वेगाने दुचाकी चालवण्यास विरोध केल्याचा राग; गॅरेज मालक व भावावर लाकडी दांडक्याने हल्ला, चौघे अटकेत
