बारामती :- माळेगाव सहकारी साखर कारखान्याची पंचवार्षिक निवडणूक नुकतीच जाहीर झाली असून या पार्श्वभूमीवर उपमुख्यमंत्री अजित पवार यांच्या उपस्थितीत उद्या गुरुवार, दि. २२ मे रोजी सकाळी १०.३० वाजता बारामतीतील कसबा येथील राष्ट्रवादी भवनात महत्त्वाचा मेळावा आयोजित करण्यात आला आहे.
या मेळाव्यात माळेगाव कारखान्याच्या निवडणुकीबाबत अजितदादा आपली स्पष्ट भुमिका मांडणार असून इच्छुक उमेदवार व कार्यकर्त्यांना मार्गदर्शन करणार आहेत. या माहितीची पुष्टी राष्ट्रवादी काँग्रेसचे तालुकाध्यक्ष राजवर्धन शिंदे यांनी दिली आहे.
आजपासून उमेदवारी अर्ज दाखल करण्यास सुरूवात झाली असून कारखान्याच्या निवडणुकीची प्रक्रिया वेग घेत आहे. याच पार्श्वभूमीवर होणाऱ्या या मेळाव्याकडे माळेगाव परिसरातील राजकीय व सहकारी क्षेत्रातील सगळ्यांचे लक्ष लागले आहे.
दरम्यान, नुकत्याच पार पडलेल्या छत्रपती सहकारी साखर कारखान्याच्या निवडणुकीत अजित पवार यांच्या नेतृत्वाखालील पॅनलने दणदणीत विजय मिळवला. त्या वेळी त्यांनी विरोधकांनाही एकत्र आणून भूमिका बजावली होती. त्यामुळे आता माळेगाव कारखान्याच्या निवडणुकीत त्यांची काय भूमिका असते, हे पाहणं औत्सुक्याचं ठरणार आहे.
