बारामती :-बारामती विधानसभा मतदारसंघात उपमुख्यमंत्री अजित पवार यांनी आठव्यांदा निवडणूक लढवण्याचा निर्णय घेतला आहे. येत्या सोमवारी, २८ ऑक्टोबर रोजी ते आपला उमेदवारी अर्ज दाखल करणार आहेत. या निमित्ताने सकाळी १० वाजता छत्रपती शिवाजी महाराज उद्यान, कसबा येथून मिरवणूक काढून बारामती शहरात मोठ्या प्रमाणात शक्तिप्रदर्शन होणार आहे.
या मिरवणुकीनंतर दुपारी १ वाजता अजित पवार निवडणूक कार्यालयात आपला उमेदवारी अर्ज दाखल करतील. अर्ज दाखल केल्यानंतर कन्हेरी येथे दुपारी २ वाजता प्रचाराचा शुभारंभ होणार आहे. त्याच ठिकाणी एक मोठी सभा आयोजित करण्यात आली आहे. कार्यकर्त्यांसाठी हा क्षण अत्यंत उत्साहाचा असून त्यांनी मोठ्या संख्येने उपस्थित राहण्याचे आवाहन पक्ष निरीक्षक सुरेश पालवे, तालुका अध्यक्ष राजवर्धन शिंदे, आणि निवडणूक प्रतिनिधी किरण गुजर यांनी केले आहे.
लोकसभा निवडणुकीनंतरचा निर्णय
लोकसभा निकालानंतर अजित पवार बारामतीतून निवडणूक लढवतील की नाही याबाबत साशंकता होती. त्यांनी एका जाहीर सभेतून निवडणूक लढवणार नसल्याचे संकेत दिले होते. मात्र कार्यकर्त्यांच्या आणि पक्षाच्या आग्रहानंतर अजित पवार यांनी बारामतीतून निवडणूक लढवण्याचा निर्णय घेतला. ही निवडणूक त्यांच्यासाठी खास आहे कारण राष्ट्रवादी काँग्रेस पक्षात झालेल्या फूटीनंतर ही पहिलीच निवडणूक असेल.
सलग विजयाची परंपरा
अजित पवारांनी १९९१ मध्ये बारामती लोकसभा मतदारसंघातून आपल्या राजकीय कारकिर्दीची सुरुवात केली. तेव्हापासून त्यांनी सात विधानसभा निवडणुका सलग जिंकल्या आहेत. या आठव्या निवडणुकीतही त्यांना विजय मिळवण्यासाठी मोठा पाठिंबा मिळेल, अशी अपेक्षा व्यक्त केली जात आहे.
कार्यकर्त्यांमध्ये जोश
या निवडणुकीत अजित पवारांचे समर्थक आणि कार्यकर्ते मोठ्या संख्येने त्यांना साथ देण्यासाठी सज्ज झाले आहेत. बारामती शहरात अजित पवार यांच्या मिरवणुकीची तयारी जोरात सुरू आहे. यावेळी मोठे शक्तिप्रदर्शन होणार असून, हा कार्यक्रम कार्यकर्त्यांमध्ये जोश निर्माण करणारा असेल.
