फलटण : प्रगत शिक्षण संस्थेच्या कमला निंबकर बालभवन व आपली शाळा येथील विद्यार्थ्यांच्या वर्षभरातील कामाच्या निवडक लेखनातून दरवर्षी ‘नवनीत’ नावाची वार्षिक पत्रिका प्रकाशित केली जाते.यावर्षी महाराष्ट्र नॉलेज कॉर्पोरेशन लिमिटेड(MKCL) चे संचालक, श्री.विवेक सावंत यांच्या हस्ते ‘नवनीत’ नावाची वार्षिक पत्रिका प्रकाशित करण्यात आली.यावेळी संस्थेच्या विश्वस्त तथा उपाध्यक्ष डॉ.मंजिरी निंबकर यांनी ‘नवनीत’ या वार्षिक पत्रिकेच्या जन्माची माहिती सांगताना यावर्षीचा अंक व त्यातील विद्यार्थ्यांचे लेखन दाखवत असताना ‘नवनीत’ च्या मलपृष्ठावर सुनिता विल्यम्स यानातून स्पेस स्टेशन मध्ये गेल्या आणि यानाच्या झालेल्या तांत्रिक बिघाडामुळे बराच काळ त्या तिथेच अडकून पडल्या मात्र त्या जेव्हा पृथ्वीवर आल्या त्याचा व्हिडिओ या बालवाडीतील विद्यार्थ्यांना दाखवण्यात आला होता. तो व्हिडिओ पाहिल्यानंतर त्याचे रेखाटन करुन चित्र काढून त्याविषयी अभिज्ञा सावंत या बालवाडीच्या मोठ्या गटातील मुलीचे चित्र व तिने त्या चित्राची सांगितलेली गोष्ट वाचताना महाराष्ट्र नॉलेज कॉर्पोरेशन लिमिटेड(MKCL) चे संचालक, श्री.विवेक सावंत यांच्या तोंडून वाक्ये निघाली, ” Wow fantastic! किती अद्भुत आहे हे! विश्वासच बसत नाही!किती बारकावे तिने या चित्रात टिपलेले आहेत. ” असे उद्गार काढले.
शैक्षणिक वर्षाच्या शेवटाकडे जाताना शिक्षकांपासून,पालकांपासून ते विद्यार्थ्यांपर्यंत सगळ्यांचेच लक्ष लागलेले असते ते कमला निंबकर बालभवन व आपली शाळा येथील मुलांच्या वर्षभरातील कामाच्या निवडक लेखनातून तयार होणाऱ्या वार्षिक ‘नवनीत’ कडे. जवळजवळ साहित्याच्या सर्वच प्रकारांमध्ये विद्यार्थी लेखन करतात. कथा,कविता, प्रवासवर्णन, आपल्या जीवनातील अविस्मरणीय क्षण!आणि बरच काही……..
मुलांच्या अभिव्यक्तीला जागा देणारे हे नवनीत मुलांच्या कल्पकतेतून व शिक्षकांच्या अथक परिश्रमातून तयार होते. मुखपृष्ठ, मलपृष्ठ अगदी संपादकीय ही विद्यार्थी व शिक्षक मिळून लिहितात. त्यामुळे ते एक वेगळ्याच उंचीवर जाऊन पोहोचते.
यात विद्यार्थ्यांचे लेखन मराठी, हिंदी आणि इंग्रजी भाषेमध्ये सुद्धा छापले जाते. यातील प्रत्येक लेख,कविता विद्यार्थ्यांची कल्पकता, सृजनशीलता आणि संवेदनशीलतेला गवसणी घालणारे असतात. यातील लेखन निसर्ग आणि पर्यावरण रक्षणाचा विचार रुजवणारे असते.
यावर्षीच्या नवनीत च्या मुखपृष्ठा वर कासव असून त्याविषयी आयुक्त कांगुणे या इयत्ता आठवीतील विद्यार्थिनीने आपला अनुभव व्यक्त केला आहे. शाळेत कासव मित्र मोहन उपाध्ये यांच्याशी ऑनलाईन झालेल्या गप्पा आणि त्यातून सागरी कासव संवर्धनामध्ये त्यांनी केलेले काम याविषयी विद्यार्थ्यांनी जाणून घेतले. मुलांनी कासव थीम वापरून बनवलेल्या काही भेटवस्तू मोहन दादांना पाठवायच्या असं ठरवून अमूर्त आकार घेऊन त्यातून वेगवेगळ्या रेषा, पोत आणि पॅटर्न चा वापर करून काढलेल्या कासवाचे चित्र हे यावर्षीचा मुखपृष्ठ ठरलं.
मुखपृष्ठ मांडणी आणि अंक मांडणी करणे हे एक कौशल्य असते.ते शिव धनुष्य पेलण्यासारखेच कठीण काम आहे असे म्हटले तर वावगे ठरणार नाही. पण ही जबाबदारी अतिशय आवडीने, निष्ठेने आणि एका अद्भुत कलाकाराच्या नजरेने मांडण्याचे काम एक हरहुन्नरी अवलिया कलाकार, अतिशय संवेदनशील व सर्जनशील अभिव्यक्ती आपल्या कलेतून मांडणारे रमाकांत धनोरकर हे गेली काही वर्ष करत आले आहेत.म्हणून त्याला एक विविधांगी आकार आला.
यावेळी संस्थेचे कार्यकारी अधिकारी प्रकाश अनभुले,संस्थेचे जनसंपर्क अधिकारी सोमीनाथ घोरपडे उपस्थित होते.तेव्हा या विद्यार्थ्यांच्या अद्भुत अभिव्यक्तीला, कल्पकतेला साहित्याच्या विविध प्रकारातून आपल्यासमोर आणणाऱ्या कमला निंबकर बालभवन व आपली शाळा मधील विद्यार्थ्यांच्या लेखणीतून तयार झालेल्या नवनीत अंक संस्थेच्या फेसबुक पेजवर जाऊन पाहण्याचे आव्हान शाळेच्या वतीने करण्यात आले.
‘नवनीत’ वार्षिक पत्रिकेचे प्रकाशन करताना MKCL चे विवेक सावंत, डॉ. मंजिरी निंबकर, प्रकाश अनभुले
