फलटण । महात्मा बसवेश्वर जयंतीनिमित्त फलटण येथील वीरशैव लिंगायत समाज सामाजिक संस्थेच्यावतीने विविध उपक्रमांचे आयोजन करण्यात आले.
बुधवार, ३० एप्रिल रोजी सकाळी १० वाजता श्री अवधूत स्वामी मंदिर, मलठण येथे महात्मा बसवेश्वर महाराजांच्या मूर्तीचे पूजन करण्यात आले. त्यानंतर सकाळी ११ ते दुपारी ४ दरम्यान रक्तदान शिबीर आणि आरोग्य तपासणी शिबिर भरवण्यात आले. दुपारी ४ वाजता वीरशैव महिला भजनी मंडळाने भक्तिमय भजन सादर केले, तर रात्री ८ वाजता श्री सद्गुरु हरिबुवा महाराज सांप्रदायिक भजनी मंडळाचे भजन रंगले.
कार्यक्रमास फलटण संस्थानचे युवराज श्रीमंत अनिकेतराजे नाईक निंबाळकर यांनी भेट देऊन कार्यक्रमाची शोभा वाढवली. यावेळी संस्थेच्यावतीने त्यांचा विशेष सत्कार करण्यात आला.
शुक्रवार, २ मे रोजी सकाळी ८ वाजता महात्मा बसवेश्वर महाराजांच्या अश्वारूढ पुतळ्याची शहरातून भव्य मिरवणूक काढण्यात आली. दुपारी १२ वाजता नवलबाई मंगल कार्यालय, मारवाड पेठ येथे महाआरती होऊन उपस्थितांना महाप्रसाद वाटप करण्यात आला.
