इंदापूर (जि. पुणे) : पत्नीच्या चारित्र्यावर संशय घेत पतीने तिची निर्घृण हत्या करून मृतदेह तब्बल ३०० किलोमीटर दूर नाशिक जिल्ह्यातील नांदगाव तालुक्यातील परधाडी घाटातील १५० फूट खोल दरीत फेकल्याचा धक्कादायक प्रकार उघडकीस आला आहे.
प्रियंका शिवाजी चितळकर (विवाहोत्तर प्रियंका ज्योतीराम करे, रा. कळाशी, ता. इंदापूर) हिचा २०१३ साली ज्योतीराम आबा करे याच्याशी विवाह झाला होता. त्यांना दोन अपत्यं आहेत. काही महिन्यांपासून पती ज्योतीराम याला पत्नीच्या वागणुकीवर संशय होता. सततचे वाद व कुरबुरी यामुळे दुरावा वाढला होता.
२९ जानेवारी २०२५ रोजी ज्योतीरामने पत्नी हरवल्याची तक्रार इंदापूर पोलिसात दाखल केली होती. मात्र तपासादरम्यान पोलिसांना संशय वाटू लागला. तीन महिन्यांच्या कसून तपासानंतर ज्योतीराम यानेच पत्नीचा खून केल्याची कबुली दिली.
त्याने सांगितले की, २७ जानेवारी २०२५ रोजी रात्री दहा वाजता कळाशी येथील घरी, वादाच्या पार्श्वभूमीवर पत्नीचा गळा दाबून खून केला. नंतर २८ जानेवारीला पहाटे मित्र दत्तात्रय शिवाजी गोलांडे (रा. गोलांडेवस्ती, इंदापूर) याच्या मदतीने मृतदेह चारचाकी गाडीतून नांदगाव तालुक्यातील ढेकूगाव-परधाडी घाटात फेकला.
पोलिसांनी ज्योतीरामकडून मिळालेल्या कबुलीवरून सदर ठिकाणी शोधमोहीम राबवून मृतदेहाचा सापळा हाती लावला आहे. या प्रकरणी पोलिस निरीक्षक सूर्यकांत कोकणे यांच्या मार्गदर्शनाखाली पोलिस उपनिरीक्षक दत्तात्रय लेंडवे तपास करीत आहेत.
