सोनं आजपर्यंत इतकं महाग कधीच झालं नव्हतं, आज उच्चांकी दरवाढ; लवकरच किंमत 1 लाखांपार?

Gold Rate Today: आज सोन्याच्या दराने सर्व विक्रम मोडीत काढले आहेत. आज सोन्याच्या दराने उच्चांकी दर गाठला आहे. आज सोन्याच्या दरात तब्बल एक हजाराहून अधिक वाढ झाली आहे. त्यामुळं ऐन लग्नसराईत सोनं महागणार आहे. सोन्याचे दर वधारल्याने ग्राहकांच्याही चिंतेत वाढ झाली आहे. त्याचबरोबर चांदीच्या दरातही मोठी वाढ झाली आहे. सोन्याचे भाव सतत असेच चढे राहिले तर लवकरच सोनं एक लाखांपर्यंतचा टप्पा गाठू शकतो, अशी शक्यता वर्तवण्यात येत आहे. 

मल्टी कमोडिटी एक्सचेंज आणि एमसीएक्स दोन्ही कडे सोन्याच्या दराने उच्चांक गाठला आहे. अमेरिका आणि चीन यांच्यात वाढणारे ट्रेड वॉर आणि मंदीची शक्यता या कारणांमुळं सोनं आणि चांदीच्या दरात तेजी दिसत असल्याचे पाहायला मिळतेय. येत्या काही दिवसांत सोनं 1.10 लाखापर्यंत जाऊ शकतं, असा तज्ज्ञांचा अंदाज आहे. 

सोन्याचे आजचे दर 98 हजार 100 रुपये प्रतितोळे तर चांदी 1 लाख 1 हजार रुपये प्रतिकिलो आहे. आंतरराष्ट्रीय बाजारावर टेरिफ वॉरचा होणारा परिणाम आणि भारतात सोन्याच्या दागिन्यांची वाढलेली मागणी यामुळे सोन्या-चांदीच्या दरात सातत्याने वाढ होत असून सोनं एक लाख पार जाण्याची शक्यता सुवर्णव्यवसायिकांनी व्यक्त केली आहे. 

मुंबईत काय आहेत सोन्याचे दर?

मुंबईत प्रतिग्रॅम सोन्याचे दर

22 कॅरेट- 8,920
24 कॅरेट- 9,731
18 क्ररेट- 7,390

एक तोळा सोन्याचे दर किती?

22 कॅरेट- 89,200
24 कॅरेट- 97,310
18 कॅरेट- 72,990