फलटण: फलटण तालुक्यातील अर्थवाहीनी समजल्या जाणाऱ्या श्रीराम सहकारी साखर कारखान्यावर राज्य सरकारने नियुक्त केलेल्या प्रशासकाला हटवण्याचा निर्णय उच्च न्यायालयाने दिला आहे. यामुळे कारखान्याच्या निवडणुकीचा मार्ग मोकळा झाला असून तालुक्यात राजकीय चर्चेला वेग आला आहे.
राज्य सरकारने आर्थिक संकटातून सावरलेल्या श्रीराम साखर कारखान्यावर प्रशासक नियुक्त केला होता. फलटणच्या प्रांताधिकारी आंबेकर मॅडम यांनी प्रशासक म्हणून कार्यभारही स्वीकारला होता. मात्र, या निर्णयाविरोधात कारखान्याचे चेअरमन डॉ. बाळासाहेब शेंडे यांनी उच्च न्यायालयात धाव घेतली होती.
आज या प्रकरणावर सुनावणी होऊन न्यायालयाने संचालक मंडळाची बाजू योग्य ठरवत राज्य सरकारचा प्रशासक हटवण्याचा आदेश दिला. त्यामुळे आता श्रीराम साखर कारखान्याच्या निवडणुकीसाठी वातावरण तापू लागले आहे.
येत्या काळात निवडणुकीची रणधुमाळी अधिक रंगणार असून सहकार आणि राजकारणातील महत्त्वाच्या घडामोडींवर सर्वांचे लक्ष लागले आहे.
