फलटण | महाराष्ट्राचे उपमुख्यमंत्री अजित पवार यांचे सुपुत्र जय पवार लवकरच विवाहबंधनात अडकणार आहेत. त्यांचा विवाह फलटण येथील हनमंतराव पवार यांची नात व प्रवीण पाटील यांची कन्या ऋतुजा पाटील यांच्यासोबत होणार आहे. या दोघांचा साखरपुडा येत्या 10 एप्रिल 2025 रोजी संपन्न होणार आहे. विशेष म्हणजे, या सोहळ्यासाठी राष्ट्रवादी काँग्रेसचे ज्येष्ठ नेते शरद पवार यांना औपचारिक निमंत्रण देण्यात आले आहे.
खासदार सुप्रिया सुळे यांनी आपल्या सोशल मीडिया हँडलवरून जय आणि ऋतुजा यांना शुभेच्छा दिल्या आहेत. जय पवार यांनी आपल्या भावी पत्नी ऋतुजा पाटील यांच्यासह शरद पवारांची भेट घेतली. यावेळी पवार कुटुंबीयांनी नव्या जोडप्याचे औक्षण करून त्यांना शुभेच्छा दिल्या. या भेटीचे फोटो सुप्रिया सुळे यांनी इन्स्टाग्रामवर शेअर केले असून, राजकीय वर्तुळात या सोहळ्याची चर्चा रंगू लागली आहे.
अजित पवार हे राज्याच्या राजकारणातील प्रभावशाली नेते आहेत. त्यांच्या कुटुंबाच्या या आनंदाच्या क्षणाला अनेक दिग्गज राजकीय नेते उपस्थित राहण्याची शक्यता आहे. या विवाहसोहळ्यातून राजकीय समीकरणे अधिक घट्ट होऊ शकतात, असे निरीक्षकांचे मत आहे.
