साखरवाडी (ता. फलटण) :-येथे बौद्ध विहार बांधण्यासाठी जागा मिळावी या मागणीसाठी बौद्ध बांधवांनी सोमवार, 10 फेब्रुवारी 2025 रोजी साखरवाडी गाव ते फलटण प्रांत कार्यालयापर्यंत पायी चालत लॉंग मार्च काढला. प्रशासनाकडून वेळोवेळी मागणी करूनही जागा मिळत नसल्याने संतप्त बौद्ध बांधवांनी प्रांत कार्यालयासमोर उपोषण सुरू केले आहे.
या आंदोलनाला शिवसेना (उद्धव बाळासाहेब ठाकरे) पक्ष, फलटण तालुका यांच्यावतीने जाहीर पाठिंबा देण्यात आला. पक्षाच्या वतीने आंदोलनकर्त्यांना समर्थन पत्र देण्यात आले असून, पक्ष भविष्यात बौद्ध विहार उभारणीसाठी आवश्यक ती मदत करेल, असे आश्वासन देण्यात आले.
या वेळी शिवसेना तालुका प्रमुख विक्रम नाळे, तालुका संघटक नंदकुमार काकडे, शहर संघटक अक्षय विलास तावरे, शिवआरोग्य सेनेचे अंकुश पवार व प्रविण पवार यांच्या उपस्थितीत पाठिंबा पत्र आंदोलनकर्त्यांना सुपूर्द करण्यात आले.
संविधानिक अधिकार असूनही प्रशासन दुर्लक्ष करत असल्याने बौद्ध बांधवांना संघर्ष करावा लागत आहे. आता हा लढा अधिक तीव्र होणार असल्याचे संकेत मिळत आहेत.
