पुणे, २५ जानेवारी: पुण्यात मागील काही दिवसांपासून अपघाताच्या घटनांमध्ये वाढ होत आहे. शुक्रवारी (२४ जानेवारी) सायंकाळी हिंजवडी-माण रस्त्यावर वडजाईनगर कॉर्नरजवळ झालेल्या भीषण अपघातात दोन विद्यार्थिनींचा दुर्दैवी मृत्यू झाला. भरधाव रेडीमिक्स डंपर वळण घेताना अचानक पलटी झाला आणि त्याखाली सापडल्याने दुचाकीवरून जाणाऱ्या दोघींचा जागीच अंत झाला.
मृत्युमुखी पडलेल्या विद्यार्थिनींची नावे प्रांजली महेश यादव (वय २२, रा. गोदरेज प्रॉपर्टीज्, म्हाळुंगे; मूळ रा. टेंभुर्णी, ता. माढा) आणि आश्लेषा नरेंद्र गावंडे (वय २२, रा. गोदरेज प्रॉपर्टीज्, म्हाळुंगे; मूळ रा. शेगाव, अमरावती) अशी आहेत. त्या एमआयटी कॉलेजमध्ये अभियांत्रिकीच्या शेवटच्या वर्षात शिक्षण घेत होत्या.
असा घडला अपघात
शुक्रवारी संध्याकाळी दोघी दुचाकीवरून जात असताना वडजाईनगर कॉर्नरजवळ भरधाव वेगात असलेल्या रेडीमिक्स डंपरवरील चालकाचे नियंत्रण सुटले. ३२ टन सिमेंट असलेला हा डंपर वळणावर पलटी झाला आणि दुर्दैवाने त्याचवेळी शेजारून निघालेल्या प्रांजली आणि आश्लेषा यांना थेट चिरडून गेला. अपघात एवढा भीषण होता की घटनास्थळीच त्यांचा मृत्यू झाला.
प्रशासनाची तातडीची कारवाई
घटनेची माहिती मिळताच हिंजवडी पोलिसांनी तातडीने घटनास्थळी धाव घेतली. तीन क्रेनच्या साहाय्याने डंपर हटवण्यात आला. मृतदेह एवढ्या वाईट अवस्थेत होते की त्यांचे तुकडे फावड्याने गोळा करताना अग्निशमन दलाच्या जवानांनाही गहिवरून आले. पोलिसांनी डंपरचालकाला ताब्यात घेतले असून अधिक तपास सुरू आहे.
परिवारावर दु:खाचा डोंगर
या भीषण घटनेमुळे संपूर्ण परिसरात हळहळ व्यक्त केली जात आहे. शिक्षणासाठी घरापासून दूर आलेल्या दोघींचा असा अंत झाल्याची माहिती मिळताच त्यांच्या कुटुंबीयांवर दुःखाचा डोंगर कोसळला. त्यांच्या कुटुंबीयांनी दोषींवर कठोर कारवाई करण्याची मागणी केली आहे.
हॅशटॅग्स:
Sahas Times,Pune Accident ,Hinjewadi, Student Death ,Road Safety ,Pune News,
