दक्षिण सोलापूर, 16 नोव्हेंबर 2024:
दक्षिण सोलापूर मतदारसंघातील सर्व मतदारांना वंचित बहुजन आघाडीचे तालुकाध्यक्ष सुरेश देशमुख यांनी आवाहन केले आहे की, यंदाच्या निवडणुकीत मतदारांनी फसव्या आश्वासनांना बळी न पडता योग्य उमेदवाराला मतदान करावे. त्यांनी सांगितले की, मतदारांनी विकास, शेतकरी सन्मान, महिला संरक्षण, जलसिंचन प्रकल्प, व एमआयडीसीसारख्या विकासकामांसाठी मतदान करणे आवश्यक आहे.
संतोष सेवू पवार – सर्वसामान्य भूमिपुत्राचा उमेदवार
देशमुख यांनी सांगितले की, वंचित बहुजन आघाडीचे उमेदवार संतोष सेवू पवार हे निर्व्यसनी, निष्कलंक, व सामान्य शेतकरी कुटुंबातून आलेले भूमिपुत्र आहेत. मतदारांनी घराणेशाही व सत्तालालसेच्या राजकारणाला फाटा देऊन या पात्र उमेदवाराला विजयी करावे.
मुस्लिम अल्पसंख्याकांवर झालेल्या अन्यायावर आवाज
ते पुढे म्हणाले की, गेल्या पाच वर्षांत मुस्लिम अल्पसंख्याकांवर मोठ्या प्रमाणात अन्याय झाला आहे, मात्र कोणत्याही मुख्य पक्षाने यावर आवाज उठवला नाही. वंचित बहुजन आघाडीने विधानसभेत मोहम्मद पैगंबर बिल मांडण्याचा प्रयत्न केला, हे मुस्लिम बांधवांनी लक्षात ठेवावे, असे आवाहन त्यांनी केले.
भाजप-काँग्रेससाठी मतांचा फसवाफसवीचा शेवट
देशमुख यांनी भाजप आणि काँग्रेस यांना एकाच नाण्याच्या दोन बाजू म्हणत, या पक्षांना मतदान करून स्वतःची फसवणूक होऊ न देण्याचे आवाहन केले. फुटलेली शिवसेना व राष्ट्रवादी यांनाही सत्तेसाठी लाचारीचे राजकारण केल्याचा आरोप त्यांनी केला.
वंचित बहुजन आघाडी – गॅस सिलेंडरवर मतदान करा
“बदल घडवायचा असेल, तर वंचित बहुजन आघाडीलाच पाठिंबा द्या. आपल्या उज्ज्वल भविष्यासाठी गॅस सिलेंडर हीच निवड आहे,” असे सांगत देशमुख यांनी मतदारांना वंचित बहुजन आघाडीच्या उमेदवाराला प्रचंड बहुमताने विजयी करण्याचे आवाहन केले.
