मिळालेल्या माहितीनुसार, बुलढाणा जिल्ह्यातील मलकापूर आगाराची एसटी बस छत्रपती संभाजीनगरच्या दिशेने निघाली होती. एसटी बसचा वेग जास्त असल्याने दुधा देवी घाट वळणावर अचानक चालकाचं बसवरील नियंत्रण सुटलं. परिणामी भरधाव एसटी बस मर्दडी देवी घाटातील खोल दरीत कोसळली. रस्त्याचा कठडा तोडून बस खोल दरीत कोसळल्याची घटना समजताच स्थानिकांनी तातडीने घटनास्थळी धाव घेतली. स्थानिक आणि पोलिसांच्या मदतीने बसमधील सर्व १३ प्रवाशांना सुखरुप वाचवण्यात आलं आहे. परंतु सहा प्रवासी किरकोळ जखमी असून त्यातील दोघांची प्रकृती गंभीर असल्याची माहिती देण्यात आली आहे.
