मुंबई विभागाचा २-० गोलने पराभव; १७ वर्षांखालील मुलींच्या संघाने राज्यस्तरीय स्पर्धेत पटकावले सुवर्णपदक
फलटण : बुलढाणा येथे सुरू असलेल्या राज्यस्तरीय हॉकी स्पर्धेत फलटणच्या मुधोजी हायस्कूल व ज्युनिअर कॉलेजच्या १७ वर्षांखालील मुलींच्या हॉकी संघाने दैदीप्यमान कामगिरी करत सुवर्णपदकावर आपले नाव कोरले आहे. अंतिम सामन्यात मुंबई विभागाच्या संघाचा २-० गोल फरकाने पराभव करून मुधोजीच्या मुलींनी राज्यस्तरावर फलटणच्या शिरपेचात मानाचा तुरा रोवला आहे.
या स्पर्धेत मुधोजी हायस्कूलच्या मुलींनी सुरुवातीपासूनच उत्कृष्ट खेळाचे प्रदर्शन केले. मैदानावरील आक्रमकता, चपळता, अचूक पासिंग, भक्कम बचावफळी आणि सांघिक समन्वय यांच्या जोरावर त्यांनी प्रतिस्पर्धी संघांसमोर कडवे आव्हान उभे केले. अंतिम सामन्यातही खेळाडूंनी आत्मविश्वासपूर्ण खेळ करत मुंबई विभागावर २-० गोलने मात केली आणि राज्यस्तरीय विजेतेपद पटकावले.
या विजयामुळे मुधोजी हायस्कूल व ज्युनिअर कॉलेजच्या क्रीडा क्षेत्रातील उज्ज्वल परंपरेत आणखी एका मानाच्या यशाची भर पडली आहे. शालेय स्तरावर सातत्यपूर्ण सराव, प्रशिक्षकांचे मार्गदर्शन, क्रीडा शिक्षकांचे परिश्रम आणि खेळाडूंची जिद्द यांचा हा विजय म्हणजे उत्कृष्ट परिणाम असल्याचे मानले जात आहे.
या उल्लेखनीय यशाबद्दल महाराष्ट्र विधान परिषदेचे माजी सभापती तथा विद्यमान आमदार श्रीमंत रामराजे नाईक निंबाळकर, फलटण कृषी उत्पन्न बाजार समितीचे सभापती रघुनाथराजे नाईक निंबाळकर, सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर आणि फलटण-कोरेगाव विधानसभा मतदारसंघाचे माजी आमदार दीपक चव्हाण यांनी सर्व खेळाडूंचे, प्रशिक्षकांचे, क्रीडा शिक्षकांचे तसेच संघाच्या यशासाठी प्रत्यक्ष व अप्रत्यक्ष योगदान देणाऱ्या सर्वांचे कौतुक करून मनःपूर्वक अभिनंदन केले आहे.
मुधोजी हायस्कूल व ज्युनिअर कॉलेजच्या मुलींच्या हॉकी संघाने मिळवलेल्या या यशाचे सातारा जिल्ह्यासह संपूर्ण हॉकीप्रेमींकडून स्वागत होत आहे. खेळाडूंचे, प्रशिक्षकांचे, मार्गदर्शकांचे आणि या यशासाठी परिश्रम घेणाऱ्या सर्वांचे अभिनंदन होत असून, या सुवर्णयशामुळे फलटणच्या क्रीडा क्षेत्राचा नावलौकिक राज्यभर पोहोचला आहे.
मुधोजीच्या मुलींच्या या सुवर्णकामगिरीमुळे फलटणच्या शिरपेचात आणखी एक मानाचा तुरा रोवला गेला असून, भविष्यात राष्ट्रीय स्तरावरही या खेळाडूंनी चमकदार कामगिरी करावी, अशा शुभेच्छा व्यक्त होत आहेत.
