पिकांचे नुकसान प्रत्यक्ष पाहून घेतला आढावा; एकही बाधित शेतकरी पंचनाम्यापासून वंचित राहू नये, प्रशासनाला सूचना
फलटण | प्रतिनिधी :
सातारा जिल्ह्यात पावसाने ओढ दिल्याने फलटणसह माण व कोरेगाव तालुक्यातील खरीप पिकांवर मोठे संकट निर्माण झाले आहे. पाण्याअभावी उभी पिके करपून जात असल्याच्या पार्श्वभूमीवर सातारा जिल्ह्याचे पालकमंत्री शंभूराज देसाई यांनी फलटण तालुक्यातील दुष्काळी परिस्थितीची प्रत्यक्ष शेतकऱ्यांच्या बांधावर जाऊन पाहणी केली.
पालकमंत्र्यांनी शेतकऱ्यांशी संवाद साधून पिकांची सद्यस्थिती, पाण्याची उपलब्धता आणि झालेल्या नुकसानीची माहिती घेतली. यावेळी संबंधित विभागांचे अधिकारी उपस्थित होते. राज्यातील दुष्काळी परिस्थितीचा प्रत्यक्ष आढावा घेऊन बाधित शेतकऱ्यांना मदत मिळवून देण्याच्या दृष्टीने प्रशासनाला आवश्यक सूचना देण्यात आल्या.
‘एकही शेतकरी पंचनाम्यापासून वंचित राहू नये’
पीक नुकसानीचे पंचनामे करताना कोणताही बाधित शेतकरी वंचित राहू नये, अशा स्पष्ट सूचना पालकमंत्री देसाई यांनी प्रशासनाला दिल्या. पंचनाम्याची कार्यवाही वेगाने पूर्ण करून अहवाल तातडीने शासनाकडे सादर करण्याच्या सूचनाही त्यांनी दिल्या आहेत.
दरम्यान, पावसाअभावी फलटणसह सातारा जिल्ह्यातील काही तालुक्यांमध्ये खरीप पिकांच्या उत्पादनावर मोठा परिणाम होण्याची शक्यता व्यक्त करण्यात आली आहे. काही अहवालांनुसार फलटण, माण, खटाव व खंडाळा भागातील खरीप पिकांचे मोठ्या प्रमाणावर नुकसान झाले आहे.
शेतकऱ्यांना शासन मदत करणार – देसाई
मुख्यमंत्री देवेंद्र फडणवीस यांच्या सूचनेनुसार राज्य शासन दुष्काळी परिस्थितीचा गांभीर्याने आढावा घेत असून अडचणीत आलेल्या शेतकऱ्यांना मदत करण्याची भूमिका शासनाने घेतली आहे. नुकसानीचा आढावा आणि पंचनाम्यांच्या आधारे मदतीची कार्यवाही केली जाणार असल्याचे राज्य सरकारकडून सांगण्यात आले आहे.
पालकमंत्री देसाई यांनीही शेतकऱ्यांनी खचून जाऊ नये, शासन त्यांच्या पाठीशी खंबीरपणे उभे आहे, अशी ग्वाही दिली. संकटाच्या काळात शेतकऱ्यांना पुन्हा उभे करण्यासाठी शासन प्रयत्नशील असल्याचे त्यांनी सांगितले.
कृषी विभागाच्या कार्यपद्धतीवर शेतकऱ्यांची नाराजी
दरम्यान, पालकमंत्र्यांच्या दुष्काळ पाहणी दौऱ्याची माहिती संबंधित कृषी विभागाकडून अनेक शेतकऱ्यांना वेळेत मिळाली नसल्याची तक्रार पुढे आली. त्यामुळे पालकमंत्री प्रत्यक्ष बांधावर आले असतानाही काही शेतकऱ्यांना आपल्या अडचणी, पीक नुकसान आणि स्थानिक पातळीवरील समस्या थेट मांडता आल्या नाहीत, अशी नाराजी व्यक्त करण्यात आली.
दुष्काळाची तीव्रता लक्षात घेता कृषी विभागाने गावनिहाय माहिती घेऊन प्रत्यक्ष शेतकऱ्यांशी संवाद साधणे, नुकसानग्रस्त क्षेत्राची पाहणी करणे आणि पंचनाम्याची प्रक्रिया पारदर्शकपणे राबवणे आवश्यक असल्याची मागणी शेतकरी वर्गातून होत आहे.
फलटण तालुक्यातील शेतकऱ्यांचे लक्ष आता शासनाच्या पंचनामे आणि मदतीच्या पुढील कार्यवाहीकडे लागले आहे.
