🏐 विद्यालयाच्या शिरपेचात विजयाचा तिहेरी मुकुट; बोराटवाडी विद्यालयाच्या मुलींचे घवघवीत यश

बोराटवाडी | प्रतिनिधी : माध्यमिक विद्यालय, म्हसोबाचीवाडी येथे आयोजित तालुकास्तरीय मुलींच्या व्हॉलीबॉल स्पर्धेत लोकनेते शहाजीराव पाटील माध्यमिक व उच्च माध्यमिक विद्यालय, बोराटवाडीच्या मुलींनी दैदिप्यमान कामगिरी करत १४, १७ आणि १९ वर्षे वयोगटात प्रथम क्रमांक पटकावला. तिन्ही वयोगटांत मिळविलेल्या या यशामुळे विद्यालयाच्या शिरपेचात विजयाचा तिहेरी मुकुट खोवला गेला आहे.

स्पर्धेत विद्यालयाचे १४ वर्षे, १७ वर्षे आणि १९ वर्षे वयोगटातील मुलींचे संघ सहभागी झाले होते. सर्वच संघांनी उत्कृष्ट खेळाचे प्रदर्शन करताना सांघिक भावना, आत्मविश्वास, शिस्त आणि जिद्द यांचे प्रभावी दर्शन घडविले. प्रतिस्पर्धी संघांसमोर दमदार खेळ करत तिन्ही संघांनी तालुकास्तरीय स्पर्धेत प्रथम क्रमांक मिळवून विजेतेपदावर आपले नाव कोरले.

या यशामागे खेळाडूंची मेहनत, नियमित सराव आणि प्रशिक्षकांचे मार्गदर्शन महत्त्वाचे ठरले. विजयी खेळाडूंना क्रीडा शिक्षक श्री. सदाशिव सावंत सर व श्री. चंद्रशेखर काळे सर यांचे मोलाचे मार्गदर्शन लाभले.

विद्यालयाच्या मुलींनी मिळविलेल्या या उल्लेखनीय कामगिरीबद्दल संस्थेचे अध्यक्ष मा. श्री. हर्षवर्धन पाटील साहेब, नीरा-भीमा संस्थेचे संचालक श्री. उदयसिंह पाटील, उपाध्यक्ष श्री. मनोजराव पाटील, माजी सचिव श्री. किरणराव पाटील, सर्व संचालक मंडळ, पालक, ग्रामस्थ तसेच विद्यालयाचे प्राचार्य श्री. चंद्रकांत कोकाटे सर यांनी विजयी खेळाडू व मार्गदर्शकांचे अभिनंदन केले.

तिन्ही वयोगटांतील संघांनी मिळविलेल्या या यशामुळे विद्यालयाच्या क्रीडा क्षेत्रातील कामगिरीत आणखी एक मानाचा तुरा रोवला गेला आहे. आता विजयी संघांची जिल्हास्तरीय स्पर्धेसाठी वाटचाल सुरू झाली असून, आगामी स्पर्धेतही उल्लेखनीय कामगिरी करण्यासाठी खेळाडूंना शुभेच्छा देण्यात आल्या.