फलटण | प्रतिनिधी :- फलटण शहरातील कोळकी परिसरात अन्न व औषध प्रशासनाने (एफडीए) मोठी कारवाई करत प्रतिबंधित गुटखा, पानमसाला आणि सुगंधित तंबाखूचा साठा जप्त केला आहे. या कारवाईत एकूण ३७ हजार ९६५ रुपयांचा मुद्देमाल हस्तगत करण्यात आला असून संबंधित संशयिताविरुद्ध फलटण शहर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, सातारा अन्न व औषध प्रशासनाच्या अन्न सुरक्षा अधिकारी रुपाली खापणे यांना कोळकी येथील मोनिता संस्कृती अपार्टमेंटमधील फ्लॅट क्रमांक २ मध्ये प्रतिबंधित गुटख्याचा साठा करण्यात आल्याची गोपनीय माहिती मिळाली होती. या माहितीच्या आधारे १७ जून रोजी रात्री साडेआठ वाजण्याच्या सुमारास पोलीस कर्मचारी आणि पंच साक्षीदारांच्या उपस्थितीत छापा टाकण्यात आला.
या कारवाईदरम्यान विमल पानमसाला, आरएमडी पानमसाला, रजनीगंधा, तुलसी जर्दा तसेच सुगंधित तंबाखूचा साठा आढळून आला. जप्त करण्यात आलेल्या या मालाची एकूण किंमत ३७ हजार ९६५ रुपये इतकी असल्याचे अधिकाऱ्यांनी सांगितले.
या प्रकरणी अन्न सुरक्षा अधिकारी रुपाली खापणे यांनी दिलेल्या फिर्यादीवरून किरण शशिकांत दोषी (रा. कोळकी, फलटण) याच्याविरुद्ध अन्न सुरक्षा व मानके कायदा २००६ अंतर्गत गुन्हा दाखल करण्यात आला आहे. याशिवाय विविध गुटखा उत्पादक कंपन्यांचे मालक आणि भागीदार यांचाही संशयितांमध्ये समावेश करण्यात आल्याची माहिती समोर आली आहे.
राज्यात गुटखा, पानमसाला आणि सुगंधित तंबाखूच्या उत्पादन, साठवणूक व विक्रीवर बंदी असतानाही छुप्या मार्गाने हा व्यवसाय सुरू असल्याचे या कारवाईतून पुन्हा अधोरेखित झाले आहे. त्यामुळे या अवैध व्यवसायामागील संपूर्ण साखळी उघडकीस आणण्यासाठी आणि संघटित गुन्हेगारीवर लगाम घालण्यासाठी संबंधितांवर महाराष्ट्र संघटित गुन्हे नियंत्रण कायदा (मोक्का) अंतर्गत कारवाई होणार का, याकडे नागरिकांसह राजकीय वर्तुळाचे लक्ष लागले आहे. दरम्यान, या प्रकरणाचा पुढील तपास फलटण शहर पोलीस करत आहेत.
