बरड | प्रतिनिधी :- शाळा प्रवेश उत्सवानिमित्त जिल्हा परिषद प्राथमिक शाळा, बरड येथे नवागत विद्यार्थ्यांचे उत्साहपूर्ण वातावरणात स्वागत करण्यात आले. या कार्यक्रमाला बरड जिल्हा परिषद गटाच्या सदस्या मा. सौ. वैशालीताई कांबळे प्रमुख पाहुण्या म्हणून उपस्थित होत्या. त्यांच्या हस्ते नवागत विद्यार्थ्यांचे पुष्पगुच्छ, शैक्षणिक साहित्य व शुभेच्छा देऊन स्वागत करण्यात आले.
यावेळी बरड गावचे प्रथम नागरिक सरपंच मा. श्री. प्रकाश लंगुटे, शाळा व्यवस्थापन समितीचे अध्यक्ष मा. श्री. तुकाराम गावडे तसेच समितीचे सदस्य उपस्थित होते. कार्यक्रमादरम्यान वैशालीताई कांबळे यांनी शाळेच्या शैक्षणिक व प्रशासकीय कामकाजाविषयी समाधान व्यक्त केले. विद्यार्थ्यांच्या सर्वांगीण विकासासाठी व शाळेच्या प्रगतीसाठी आवश्यक ते सर्वतोपरी सहकार्य करण्याचे आश्वासन त्यांनी दिले.
सदर कार्यक्रमाला बरड गावातील पालक, ग्रामस्थ व शिक्षणप्रेमी नागरिकांनी मोठ्या संख्येने उपस्थिती लावली. यावेळी गावातील सामाजिक कार्यकर्ते मा. श्री. दत्ता टेंबरे यांनी विद्यार्थ्यांना खाऊ वाटप करून त्यांचा उत्साह वाढविला.
कार्यक्रमाचे सूत्रसंचालन श्री. ढगे सर यांनी केले. शाळेचे मुख्याध्यापक मा. श्री. उदयकुमार नाळे यांनी उपस्थित मान्यवर, पालक व ग्रामस्थांचे आभार मानून कार्यक्रमाची सांगता केली.
शाळा प्रवेश उत्सवामुळे नवागत विद्यार्थ्यांमध्ये आनंदाचे वातावरण निर्माण झाले असून शिक्षणाच्या प्रवासाची प्रेरणादायी सुरुवात झाली आहे.
