अजीम आतारवर कठोर कारवाईची मागणी; मुस्लिम समाजातर्फे जाहीर निषेध
अजीम आतारवर कठोर कारवाईची मागणी; मुस्लिम समाजातर्फे जाहीर निषेध
फलटण | प्रतिनिधी :- छत्रपती संभाजी महाराज जयंतीनिमित्त सोशल मीडियावर पोस्ट शेअर केल्याच्या कारणावरून युवकाला धमकी देत मारहाण केल्याची घटना फलटण शहरात घडली असून, या प्रकरणातील आरोपी अजीम हसन आतार याच्यावर कठोर कारवाई करण्याची मागणी विविध स्तरातून होत आहे. विशेष म्हणजे, या घटनेचा मुस्लिम समाजानेही जाहीर निषेध नोंदवत शहरातील शांतता व सामाजिक सलोखा कायम ठेवण्याचे आवाहन केले आहे.
मिळालेल्या माहितीनुसार, फलटण येथील दत्तनगर परिसरात राहणारे अनिकेत संतोष घाडगे यांनी 14 मे 2026 रोजी छत्रपती संभाजी महाराज जयंतीनिमित्त आपल्या इंस्टाग्राम अकाउंटवर काही पोस्ट शेअर केल्या होत्या. या पोस्टमुळे संतप्त झालेल्या अजीम हसन आतार याने अनिकेत घाडगे यांना फोन करून अर्वाच्य भाषेत शिवीगाळ केली. तसेच पोस्ट डिलीट न केल्यास गंभीर परिणाम भोगावे लागतील, अशी धमकी दिल्याचा आरोप आहे.
यानंतरही आरोपीने अनिकेत घाडगे यांच्या घरी जाऊन त्यांना मारहाण केली व पुन्हा अशा प्रकारच्या पोस्ट केल्यास जीवे मारण्याची धमकी दिल्याचे तक्रारीत नमूद करण्यात आले आहे. या घटनेनंतर घाबरलेल्या अनिकेत घाडगे यांनी फलटण शहर पोलीस ठाण्यात धाव घेत तक्रार दाखल केली. पोलिसांनी तत्काळ गुन्हा नोंदवत आरोपी अजीम हसन आतार याला अटक केली आहे.
दरम्यान, फलटण शहरातील विविध हिंदुत्ववादी संघटना तसेच सकल हिंदू समाजाच्या वतीने या घटनेचा निषेध करण्यात आला. आरोपीवर कठोरात कठोर कारवाई करण्यात यावी, अशी मागणी करण्यात आली आहे. शहरातील शांतता अबाधित राहावी आणि समाजात तेढ निर्माण करणाऱ्या घटना पुन्हा घडू नयेत, यासाठी सामाजिक प्रबोधनाची गरज असल्याचे मतही नागरिकांकडून व्यक्त होत आहे.
फलटण हे सर्व धर्मीय आणि जाती-जमातीतील नागरिकांच्या ऐक्याचे शहर म्हणून ओळखले जाते. त्यामुळे अशा प्रकारच्या घटना शहराच्या सामाजिक वातावरणाला बाधा पोहोचवणाऱ्या असल्याची भावना नागरिकांतून व्यक्त होत आहे.
