नागसेन बुद्ध विहार त्रिमली येथे श्रामणेर व बौद्धाचार्य प्रशिक्षण शिबिरास उत्साहात प्रारंभ
खटाव : नागसेन बुद्ध विहार, त्रिमली येथे भारतीय बौद्ध महासभा शाखा सातारा जिल्हा पूर्व व भारतीय बौद्ध महासभा शाखा खटाव तालुका यांच्या संयुक्त विद्यमाने आयोजित श्रामणेर व बौद्धाचार्य प्रशिक्षण शिबिराचा उद्घाटन सोहळा धम्ममय वातावरणात संपन्न झाला. दिनांक ८ मे ते १७ मे २०२६ या कालावधीत आयोजित या शिबिरात खटाव तालुक्यातील उपासक श्रामणेर व बौद्धाचार्य प्रशिक्षणासाठी सहभागी झाले आहेत.
शिबिराच्या प्रारंभी भारतीय बौद्ध महासभेच्या भिक्षू संघाचे सदस्य भंते धम्मानंद बोधी यांच्या शुभहस्ते श्रामणेर दीक्षा विधी पार पडला. यावेळी त्यांनी उपासकांना चिवर प्रदान करून त्रिसरण व अष्टशील दिले. बुद्ध, धम्म आणि संघ यांच्यावरील श्रद्धा दृढ ठेवून शील, समाधी व प्रज्ञेच्या मार्गाने जीवन जगण्याचा संदेश त्यांनी उपस्थितांना दिला.
या प्रशिक्षण शिबिरासाठी भारतीय बौद्ध महासभा शाखा सातारा जिल्हा पूर्व यांच्या मागणीनुसार केंद्रीय शिक्षक तथा सातारा जिल्हा पूर्वचे हिशोब तपासणी आयु. बाळासाहेब जाधव, आयु. अविनाश बारसिंग सर व आयु. सुनील कदम सर हे मार्गदर्शक म्हणून जबाबदारी सांभाळणार आहेत. शिबिरामध्ये धम्म, विनय, बौद्धाचार, त्रिसरण-पंचशील, संघकार्य, धम्मप्रसार आणि सामाजिक बांधिलकी यांवर मार्गदर्शन करण्यात येणार आहे.
यावेळी भारतीय बौद्ध महासभा शाखा फलटण तालुक्याचे माजी सरचिटणीस तथा केंद्रीय शिक्षक आयु. बाबासाहेब जगताप यांनी उपस्थितांना मार्गदर्शन करताना “भारतीय बौद्ध महासभा ही समाजाची मातृसंस्था असल्याचे सांगितले. त्यांनी संस्थेच्या माध्यमातून विविध प्रकारची २४ शिबिरे आयोजित करून धम्माचा प्रचार आणि प्रसार व्यापक प्रमाणात करण्याचे आवाहन केले. समाजात नैतिकता, समता, बंधुता आणि प्रज्ञेचा विचार रुजवण्यासाठी अशा प्रशिक्षण शिबिरांची आवश्यकता असल्याचे त्यांनी नमूद केले. तसेच श्रामणेर दीक्षा घेतलेल्या सर्व दीक्षार्थींना शुभेच्छा देत धम्ममार्गावर दृढ राहण्याचे आवाहन केले.
कार्यक्रमाचे प्रास्ताविक केंद्रीय शिक्षक आयु. बाळासाहेब जाधव यांनी केले. कार्यक्रमाचे अध्यक्षस्थान भारतीय बौद्ध महासभा शाखा खटाव तालुक्याचे अध्यक्ष आयु. अरुण रणदिवे यांनी भूषविले.
यावेळी भारतीय बौद्ध महासभा शाखा सातारा जिल्हा पूर्वचे सरचिटणीस आयु. सुनील कदम यांनी संपूर्ण विधी व कार्यक्रमाचे नियोजन संस्थेच्या प्रोटोकॉलनुसार करून घेतले. त्यांनी कार्यक्रमादरम्यान आवश्यक त्या सूचना देत अध्यक्षांच्या उपस्थितीत संपूर्ण कार्यक्रम शिस्तबद्ध पद्धतीने पार पाडला. तसेच हे शिबिर यशस्वी होण्यासाठी आवश्यक समन्वय व नियोजन करत वरिष्ठांशी संपर्क साधून शिबिराच्या यशस्वी आयोजनासाठी विशेष प्रयत्न केले. त्यांनी भारतीय बौद्ध महासभा शाखा खटाव तालुक्याला शुभेच्छा देत शिबिरात सहभागी झालेल्या श्रामणेर दीक्षार्थींना पुढील धम्मश्रवण व धम्मग्रहणासाठी मंगल शुभेच्छा दिल्या. शेवटी त्यांनी उपस्थित मान्यवर, उपासक व कार्यकर्त्यांचे आभार मानले.
या प्रसंगी भारतीय बौद्ध महासभा शाखा सातारा जिल्हा पूर्वचे केंद्रीय शिक्षक आयु. बाळासाहेब जाधव, सरचिटणीस आयु. सुनील कदम सर, संस्कार उपाध्यक्ष आयु. अविनाश बारसिंग सर, कुमार सरतापे, भारतीय बौद्ध महासभा शाखा फलटण तालुक्याचे माजी कार्यालय सचिव तथा केंद्रीय शिक्षक आयु. चंद्रकांत मोहिते सर, भारतीय बौद्ध महासभा शाखा फलटण तालुका माजी कार्यकारणी संघटक आनंद जगताप सर, कोषाध्यक्ष आयु. विठ्ठल निकाळजे सर, संरक्षण उपाध्यक्ष कृष्णात केंजळे, दयानंद केंजळे, जिल्हा संघटक सुधाकर शिलवंत, उत्तम मस्के, केंद्रीय शिक्षिका राजश्री ताई मस्के, गौतम केंजळे, रण बहाद्दर तसेच त्रिमली गावातील श्रद्धावान उपासक मोठ्या संख्येने उपस्थित होते.
संपूर्ण परिसर बुद्ध वंदना, त्रिसरण-पंचशील आणि धम्मभावनेने भारावून गेला होता. हे शिबिर धम्मसंस्कार, संघटन बळकटी आणि धम्मप्रसारासाठी प्रेरणादायी ठरत असल्याची भावना उपस्थितांनी व्यक्त केली.
