फलटण :- फलटण येथील उपजिल्हा रुग्णालयातील महिला डॉक्टरच्या आत्महत्या प्रकरणात अटकेत असलेला बडतर्फ पोलीस उपनिरीक्षक (PSI) गोपाळ बदने याला अखेर जामीन मंजूर झाला आहे. मुंबई उच्च न्यायालयाच्या कोल्हापूर सर्किट बेंचने 50 हजार रुपयांच्या वैयक्तिक जातमुचलक्यावर आणि काही अटींसह हा जामीन दिला.
पाच महिन्यांनंतर कारागृहातून सुटका
23 ऑक्टोबर 2025 रोजी फलटणमधील एका हॉटेलमध्ये महिला डॉक्टरने गळफास घेऊन आत्महत्या केली होती. या प्रकरणात आत्महत्येस प्रवृत्त केल्याच्या आरोपाखाली PSI गोपाळ बदने आणि प्रशांत बनकर यांना अटक करण्यात आली होती.
गेल्या पाच महिन्यांपासून न्यायालयीन कोठडीत असलेल्या बदनेने जामिनासाठी अर्ज केला होता. दोन्ही बाजूंचा युक्तिवाद ऐकल्यानंतर न्यायालयाने त्याला दिलासा दिला.
प्रकरणाचा तपशील काय?
मूळची बीड येथील असलेली ही महिला डॉक्टर फलटणच्या उपजिल्हा रुग्णालयात कार्यरत होती. ती प्रशांत बनकर यांच्या घरी भाड्याने राहत होती.
काही कारणावरून घरमालक आणि डॉक्टर यांच्यात वाद निर्माण झाला. त्यानंतर तिच्या राहत्या घराला कुलूप लावण्यात आले.
या घटनेनंतर डॉक्टरने ‘मधूदीप’ हॉटेलमध्ये रूम घेतली. तिने मदतीसाठी प्रशांत बनकर आणि PSI गोपाळ बदने यांच्याशी संपर्क साधला होता, मात्र तिला अपेक्षित मदत मिळाली नाही.
रुमच्या दरवाजा न उघडल्याने पोलिसांनी तो तोडला असता, डॉक्टरने आत्महत्या केल्याचे समोर आले. विशेष म्हणजे, मृत्यूपूर्वी तिने स्वतःच्या हातावर लिहिलेल्या चिठ्ठीत बदने आणि बनकर यांच्याकडून होत असलेल्या शारीरिक व मानसिक छळाचा उल्लेख केला होता.
न्यायालयाचा निर्णय आणि पुढील दिशा
या प्रकरणात पोलिसांनी दोघांनाही अटक केली होती. कोल्हापूर सर्किट बेंचमध्ये झालेल्या सुनावणीत सरकारी आणि बचाव पक्षाने जोरदार युक्तिवाद मांडला. त्यानंतर न्यायालयाने अटींसह गोपाळ बदनेचा जामीन अर्ज मंजूर केला.
या निर्णयानंतर तपास यंत्रणा पुढे काय भूमिका घेणार, याकडे सर्वांचे लक्ष लागले आहे.
