फलटण :- फलटण नगरपरिषदेच्या सर्वसाधारण सभेत तब्बल ४६ विषयांना मंजुरी देण्यात आली. विरोधी नगरसेवकांनी काही विषयांवर उपसूचना मांडून विरोध दर्शवला; मात्र सत्तारूढ पक्षाच्या बहुमतामुळे त्या फेटाळण्यात आल्या. या सभेत नामांतराचा मुद्दा सर्वाधिक चर्चेचा ठरला असून, यावरून सत्ताधारी आणि विरोधक नगरसेवकांमध्ये तीव्र वाद झाल्याचे पाहायला मिळाले.
तीन तास चाललेल्या या बैठकीत शहरातील रस्ते, चौक, इमारती आणि सभागृहांना नवी नावे देण्याच्या प्रस्तावांवर चर्चा झाली. नवीन नगरपरिषद इमारतीला ‘छत्रपती शिवाजी महाराज भवन’, सभागृहांना ‘क्रांतिसूर्य महात्मा ज्योतिबा फुले’ व ‘भारतरत्न डॉ. बाबासाहेब आंबेडकर’ अशी नावे देण्याचा प्रस्ताव मांडण्यात आला. तसेच जुन्या इमारतीला ‘छत्रपती सईबाई महाराणी भवन’, ‘श्रीमंत रामराजे शॉपिंग सेंटर’ला ‘पुण्यश्लोक अहिल्यादेवी होळकर शॉपिंग सेंटर’ असे नामांतर करण्याबाबतही चर्चा झाली.
याशिवाय विविध भागांना ‘माता रमाई चौक’, ‘छत्रपती संभाजी नगर’, ‘छत्रपती सईबाई महाराणी साहेब नगर’ आणि ‘फिरंगाई देवी नगर’ अशी नावे देण्याची मागणी सत्ताधाऱ्यांनी केली. या प्रस्तावांवरून सभागृहात वातावरण तापले होते. “महापुरुष हे आमची अस्मिता आहेत,” असे म्हणत नगरसेवक सचिन अहिवळे यांनी आक्रमक भूमिका घेतली, तर “महापुरुषांना जातीपुरते मर्यादित करू नये,” असे प्रतिपादन नगरसेवक विकास काकडे यांनी केले.
नगरसेविका श्वेता तारळकर यांनी मांडलेली उपसूचना सत्ताधाऱ्यांनी नाकारली. दरम्यान, विविध प्राधिकरणांना ना हरकत दाखले देण्याच्या ठरावावर नगरसेवक अनिकेतराजे नाईक निंचाळकर यांनी कायदेशीर आक्षेप घेतला. हा ठराव कायद्याच्या विरोधात ठरू शकतो, असा मुद्दा त्यांनी मांडला. यावर नगराध्यक्ष समशेरसिंह नाईक निंबाळकर यांनी स्पष्टीकरण देत मोठ्या निधीच्या कामांना अडथळा येऊ नये म्हणूनच हा निर्णय घेतल्याचे सांगितले.
अखेर बहुमताच्या जोरावर हा ठराव मंजूर करण्यात आला. याशिवाय सीसीटीव्ही यंत्रणा कार्यान्वित करणे, गाळ्यांचे फेरलिलाव करणे यांसारखे इतर प्रस्तावही मंजूर करण्यात आले.
